ब्राजिलियन स्टार विंगर विनिसियस जुनियरले स्पेनिस क्लब रियल म्याड्रिडसँग सन् २०३२ सम्म रहने गरी नयाँ छ वर्षे सम्झौता गरेका छन्। यससँगै उनी अझै लामो समय सान्टियागो बर्नाबेउमै रहने भएका छन्।
२६ वर्षीय विनिसियसको अघिल्लो सम्झौता अब एक वर्ष मात्र बाँकी थियो। त्यसबीच उनलाई इंग्लिस क्लब आर्सनलले अनुबन्ध गर्न चासो देखाएको चर्चा चलेको थियो। तर रियल म्याड्रिडले बिहीबार नयाँ सम्झौताको घोषणा गर्दै विनिसियससँग सन् २०३२ जुन ३० सम्मका लागि सहमति भएको जनाएको छ।
सम्झौतापछि विनिसियसले इन्स्टाग्राममा लेखेका छन्, "बर्नाबेउमा बिताएका आठ वर्ष निकै छोटा लागे। अब थप छ वर्ष, अनि त्यसपछि सधैंका लागि।"
रियल म्याड्रिडले पनि विज्ञप्ति जारी गर्दै विनिसियसलाई क्लबको सफल इतिहासका सबैभन्दा महत्वपूर्ण खेलाडीमध्ये एकको रूपमा वर्णन गरेको छ।
सन् २०१८ मा ब्राजिलियन क्लब फ्लामेङ्गोबाट रियलमा आएका विनिसियसले त्यसयता ३७५ खेलमा १२८ गोल गरेका छन्। ब्राजिलको राष्ट्रिय टोलीबाट उनले ५४ खेलमा १३ गोल गरेका छन्।
रियलका लागि उनले दुई पटक यूईएफए च्याम्पियन्स लिग, तीन ला लिगा र एक कोपा डेल रे उपाधि जितिसकेका छन्।
रियल र विनिसियसबीच पछिल्लो १८ महिनादेखि नयाँ सम्झौताबारे छलफल चलिरहेको थियो। अन्ततः क्लबले नयाँ प्रस्ताव राखेपछि दुवै पक्षबीच सहमति जुटेको बताइएको छ।
यता, विनिसियसले नयाँ सम्झौता नगरेको अवस्थामा आर्सनलले उनलाई भित्र्याउने प्रयास तीव्र बनाउने तयारी गरेको थियो। तर अब उनको भविष्य रियलमै सुरक्षित भएपछि आर्सनलले बायाँ विंगका लागि अन्य विकल्प खोज्नुपर्ने भएको छ।
यही दिन रियल म्याड्रिडले आइभोरी कोस्टका विंगर यान डियोमान्डेलाई आरबी लाइपजिगबाट करिब १४० मिलियन युरो (१२० मिलियन पाउन्ड) सम्मको सम्झौतामा अनुबन्ध गरेको पनि घोषणा गरेको छ। नयाँ मुख्य प्रशिक्षक जोजे मोरिन्होको नेतृत्वमा यो रियलको यस समरको छैटौं खेलाडी अनुबन्ध हो।
-1785914803.jpg)
