एसी मिलानका मुख्य प्रशिक्षक मासिमिलियानो अलेग्रीले क्रोएसियाका कप्तान लुका मोड्रिच क्लबमा आउन लागेको पुष्टि गरेका छन्।
३९ वर्षीय मोड्रिचले यही मे महिनामा घोषणा गरेका थिए कि उनी अमेरिकी भूमिमा भइरहेको क्लब विश्वकप सकिएपछि १३ वर्ष लामो रियल मड्रिड यात्रालाई अन्त्य गर्दै क्लबबाट विदा लिनेछन्।
मोड्रिचको नयाँ गन्तव्यको पुष्टि अलेग्रीले आफूले एसी मिलानमा दोस्रो कार्यकाल सुरु गरेको पहिलो पत्रकार सम्मेलनमा गरे। "मोड्रिच अगस्टमा मिलान आउनेछन्। उनी एक असाधारण खेलाडी हुन्," अलेग्रीले भने।
मोड्रिचले क्लब विश्वकपमा रियल मड्रिडका लागि पाँचवटा खेलमा विकल्पका रूपमा मैदान प्रवेश गरिसकेका छन्, जसमा बोरुसिया डोर्टमुन्डविरुद्धको ३–२ को जितपश्चात रियलले सेमिफाइनलमा पेरिस सेन्ट जर्मेनको सामना गर्नेछ।
२०१८ को बलन डि’ओर विजेता मोड्रिचले रियल मड्रिडमा २०१२ मा टोटनह्यामबाट आएको यता २८ उपाधि, जसमा छ पटक च्याम्पियन्स लिग र चार पटक ला लिगा जितेका छन्।
मोड्रिच सन् २०२६ को विश्वकपमा क्रोएसियाबाट पुनः प्रतिनिधित्व गर्न इच्छुक छन् र त्यसका लागि आगामी सिजन पनि उच्च स्तरमा प्रतिस्पर्धा गर्न चाहन्छन्।
गत सिजन सिरी ए मा आठौं स्थानमा सीमित रहेको मिलानले गत महिना मिडफिल्डर तिज्जानी रेजेन्डर्सलाई म्यानचेस्टर सिटी पठाएको थियो, भने डिफेन्डर थियो हेर्नान्डेज साउदीको अल–हिलालसँग जोडिएका छन्।
यद्यपि अलेग्रीले गोलकिपर माइक माइन्यान र फरवार्ड राफाएल लिओ क्लबमै रहने अपेक्षा व्यक्त गरेका छन्। "रेजेन्डर्स र हेर्नान्डेज अब टोलीमा रहने छैनन्, तर माइन्यान र लिओ रहन इच्छुक देखिएका छन्," उनले बताए।
फ्रान्सका गोलकिपर माइन्यानप्रति चेल्सीले चासो देखाएपनि £२५ मिलियनको मूल्याङ्कन पूरा नगरेकाले सम्झौता हुन सकेन।
अलेग्रीको नेतृत्वमा मिलानले २३ अगस्टमा क्रेमोनेजविरुद्धको खेलबाट नयाँ सिजनको सुरुवात गर्नेछ। उनले आफ्नो पहिलो कार्यकालमा सन् २०११ मा एसी मिलानलाई सिरी ए उपाधि जिताएका थिए।
