इन्डियन प्रिमियर लिग (आईपीएल) २०२५ को विजेता रोयल च्यालेन्जर्स बेंगलुरु (आरसीबी)को विजय उत्सवले खुसीको क्षणलाई शोकमा बदलिदियो, जब भागदौडको घटनामा ११ जनाको ज्यान गयो। यस घटनाको अनुसन्धानको क्रममा बेंगलुरु प्रहरीले आरसीबीका मार्केटिङ तथा राजस्व प्रमुख निखिल सोसालेलाई पक्राउ गरेको छ।
शुक्रबार केम्पेगौडा अन्तर्राष्ट्रिय विमानस्थलबाट उनलाई नियन्त्रणमा लिइएको हो। प्रहरी स्रोतका अनुसार, सोसालेसँगै कार्यक्रम व्यवस्थापन कम्पनी डिएनए इन्टरटेन्मेन्ट नेटवर्कका वरिष्ठ कार्यक्रम प्रबन्धक किरण कुमार र उपाध्यक्ष (व्यवसाय) सुनील मैथ्यूलाई पनि नियन्त्रणमा लिइएको छ।
मुख्यमन्त्रीको कडा आदेश
उक्त घटनापछि कर्नाटकका मुख्यमन्त्री सिद्धरामैयाले आरसीबी, डिएनए इन्टरटेन्मेन्ट, र कर्नाटक राज्य क्रिकेट संघ (केएससीए)का जिम्मेवार प्रतिनिधिहरूलाई तुरुन्त पक्राउ गर्न निर्देशन दिएका थिए। उनले यस घटनाको छानबिनका लागि एक न्यायिक आयोग गठन गरिएको घोषणा गरेका छन्, जसको नेतृत्व सेवानिवृत्त उच्च अदालतका न्यायाधीश माइकल डी’कुन्हाले गर्नेछन्। आयोगले ३० दिनभित्र प्रतिवेदन बुझाउनुपर्नेछ।
उच्च प्रहरी अधिकारीहरू निलम्बित
मुख्यमन्त्रीको निर्देशनमा बेंगलुरुका प्रहरी आयुक्त बी. दयानन्द, अतिरिक्त आयुक्त विकास कुमार, केन्द्रीय डीसीपी शेखर एच. टेक्कण्णावर, तथा क्युबन पार्क प्रहरी चौकीका निरीक्षकसहित अन्य उच्च प्रहरी अधिकारीहरूलाई निलम्बन गरिएको छ।
कार्यक्रम बिना अनुमति, सुरक्षा व्यवस्थामा लापरवाही
प्रहरी अनुसन्धान अनुसार, आरसीबीले बिना अनुमति कार्यक्रम आयोजना गरेको, सुरक्षामा गम्भीर लापरवाही गरेको र घटनापछि उद्धारमा ढिलाइ गरेको पाइएको छ। यिनै आधारमा आरसीबीसहित सम्बन्धित पक्षहरूविरुद्ध एफआईआर दर्ता गरिएको छ।
यो घटनाले आयोजकहरू, सुरक्षा संयन्त्र र राज्य प्रशासन सबैप्रति गम्भीर प्रश्न उठाएको छ। जस उत्सवको रूपमा मनाइनु पर्ने थियो, त्यो सन्त्रास र शोकमा परिणत भएको छ।
