ब्रेन्नन जोनसनले पहिलो हाफमा गरेको गोल निर्णायक सावित भयो, जसको आधारमा टोटनहम हट्स्परले म्यानचेस्टर युनाइटेडलाई पराजित गर्दै युरोपा लिगको उपाधि जित्यो। यससँगै टोटनहमले १७ वर्ष लामो उपाधि खडेरी तोडेको छ।
हेड कोच एन्ज पोस्टेकोग्लुले दोस्रो सिजनमै टोटनहमलाई ट्रफी जिताउने आफ्नो वाचा पुरा गरे। खेलअघि उनले आफू "जोकर कहिल्यै नबन्ने" घोषणा गरेका थिए, तर उनले बिलबाओको सान मामेस स्टेडियममा उपस्थित करिब १५,००० टोटनहम समर्थकलाई खुसी र उत्साहले भरिदिएका थिए।
यद्यपि यो जितले पोस्टेकोग्लुलाई क्लबमा लामो समय टिकाउने हो कि होइन भन्ने अझै स्पष्ट छैन। तर उनले बिल निकोलसन र कीथ बर्किनशलाई जस्तै युरोपियन उपाधि जिताउने प्रशिक्षकको रूपमा आफूलाई स्थापित गराएका छन्।
यो सिजन न्यु क्यासल र क्रिस्टल प्यालेसजस्ता दुर्लभ रूपमा उपाधि जित्ने क्लबहरूको पङ्क्तिमा टोटनहम पनि सामेल भएको छ। साथै, च्याम्पियन्स लिगको लागि योग्य ठहरिँदा क्लबले £१०० मिलियनको आर्थिक फाइदा पनि पाउने भएको छ।
हारको पीडामा डुब्यो म्यानचेस्टर युनाइटेड
युरोपियन फाइनल खेल्ने सबैभन्दा तल्लो स्थानमा रहेका दुई क्लबबीचको भिडन्तमा हारको पीडाबाट युनाइटेड उन्मुक्त हुन सकेन।
युनाइटेडका प्रशिक्षक रुबेन अमोरिम अब आइतबारको अन्तिम प्रिमियर लिग खेलमा एस्टन भिल्लाविरुद्ध टोली पठाउने तयारीमा छन्। यो सिजन युनाइटेडका लागि सन् १९७३–७४ को रेलिगेसन सिजनपछिको सबैभन्दा खराब रहेको छ।
अमोरिमप्रति मालिकहरूको समर्थन भए पनि उनले म्यासन माउन्टलाई गार्नाचोको साटो अग्रपंक्तिमा राख्ने निर्णय काम लागेन। कप्तान ब्रुनो फर्नान्डेस पनि प्रभावशाली हुन सकेनन्।
दोस्रो हाफमा रास्मुस होइलुनको हेडरलाई मिकी भान डे भेनले लाइनबाट बचाए। अन्त्यतिर गोलकिपर भिकारीओले लुक शको हेडर बचाउँदै जित सुनिश्चित गरे।
जोनसनको गोल — विवादास्पद तर ऐतिहासिक
पहिलो हाफको अन्त्यतिर पापे मातार सारले गरेको क्रसमा ब्रेन्नन जोनसनले लुक शभन्दा अघि बल छोए। बल उनले नै अन्तिमपटक छोएका हुन् वा होइनन् भन्नेमा विवाद भए पनि, बलले शलाई लागेपछि गोलकिपर ओनाना छकिएको थिए। जोनसनको दोस्रो प्रयासले बललाई जालीमा पुर्यायो।
खेलभर टोटनहमको त्यो एकमात्र टार्गेटमा प्रहार थियो, तर त्यसले नै जित सुनिश्चित गर्यो।
पोस्टेकोग्लुको टोटनहममा यो १००औं खेल थियो। अष्ट्रेलिया, जापान, स्कटल्याण्डका क्लबहरूमा दोस्रो सिजनमै उपाधि जिताउने उनको परम्परा टोटनहममा पनि दोहोरिएको हो।
युनाइटेडका लागि कुनै चमत्कार आएन
अतिरिक्त ७ मिनेटको इन्जुरी टाइममा युनाइटेडले १९९९ को ऐतिहासिक फाइनलझैं चमत्कारको आशा गरे पनि त्यो सम्भव भएन।
क्लबका पूर्वखेलाडीहरू रियो फर्डिनान्ड र वेन रूनीजस्ता हस्तीहरू दर्शकदीर्घामा थिए, तर उनीहरूले आफ्ना पुराना दिनहरूलाई मात्रै सम्झन सके।
खेलको अन्त्यमा गार्नाचोको प्रयास साइड-नेटमा गयो। होइलुनको हेडर बारमाथिबाट गयो, अनि जोशुआ जिर्कजीको हेडरलाई भिकारीओले रोक्दै खेल सकियाे ।
यस हारसँगै म्यानचेस्टर युनाइटेड सन् १९९० यता दोस्रोपटक युरोपियन फुटबलबाट बाहिरिने भएको छ। अब उनीहरूले आगामी सिजन केवल काराबाओ कपमा भाग लिनेछन्।
