भारतका प्रधानमन्त्री नरेन्द्र मोदीले प्रश्नपत्र चुहावट (पेपर लिक) प्रकरणमा पहिलो पटक सार्वजनिक प्रतिक्रिया दिएका छन्। उनले युवाको भविष्यसँग खेल्नेहरूलाई कुनै हालतमा नछोडिने चेतावनी दिँदै दोषीलाई कडा सजाय दिलाउन सरकारले फास्ट ट्र्याक अदालत गठन गर्ने निर्णय गरेको बताएका छन्।
प्रधानमन्त्री मोदीले बिहीबार आफ्नो आधिकारिक एक्स (X) खातामार्फत लेखेका छन्, “युवाको कल्याण र भविष्यभन्दा महत्त्वपूर्ण अर्को कुनै कुरा छैन।”
उनले प्रश्नपत्र चुहावटमा संलग्न व्यक्तिलाई छिटो र कडा कारबाही गर्न फास्ट ट्र्याक अदालत स्थापना गर्ने निर्णय गरिएको जानकारी दिँदै सम्बन्धित निकायलाई आवश्यक सबै प्रक्रिया अघि बढाउन निर्देशन दिएको बताए।
“युवाको भविष्य बिगार्ने प्रयास गर्नेहरूलाई कुनै पनि हालतमा उम्किन दिइने छैन,” उनले उल्लेख गरेका छन्।
मोदीको यो प्रतिक्रिया राष्ट्रिय पात्रता तथा प्रवेश परीक्षा (नीट–यूजी) लगायत विभिन्न परीक्षामा भएको भनिएको प्रश्नपत्र चुहावटको विरोधमा विद्यार्थी तथा विभिन्न समूहले गरिरहेको आन्दोलनका बीच आएको हो।
यसअघि मंगलबार सत्तारुढ राष्ट्रिय लोकतान्त्रिक गठबन्धन (एनडीए) का सांसदहरूसँगको बैठकमा पनि उनले युवासम्म पुगेर उनीहरूको चिन्ता सम्बोधन गर्न आग्रह गरेका थिए। साथै, प्रश्नपत्र चुहावटजस्ता अनियमिततामा संलग्न व्यक्तिलाई कडा सजाय दिनुपर्ने बताएका थिए।
ककरोच जनता पार्टीको प्रतिक्रिया
आन्दोलनको नेतृत्व गरिरहेको ककरोच जनता पार्टी (सीजेपी) ले प्रधानमन्त्रीको अभिव्यक्तिपछि सामाजिक सञ्जालमार्फत प्रतिक्रिया दिँदै शिक्षामन्त्री धर्मेन्द्र प्रधानले तत्काल राजीनामा दिनुपर्ने माग दोहोर्याएको छ।
नीट आन्दोलन चर्किँदै
जुलाई २० देखि सुरु भएको आन्दोलन सामाजिक अभियन्ता सोनम वाङ्चुकले आमरण अनशन थालेपछि थप सशक्त बनेको थियो। आन्दोलनका क्रममा वाङ्चुकलाई जन्तर–मन्तरबाट प्रहरीले नियन्त्रणमा लिएर अस्पताल भर्ना गरेपछि विरोध झन् चर्किएको हो। वाङ्चुकले त्यसलाई “गैरकानुनी नियन्त्रण” भएको बताएका थिए।
सोमबार संसदतर्फ मार्च गरेका विद्यार्थीलाई रोक्न दिल्ली प्रहरीले लाठीचार्ज, अश्रुग्यास र विद्युतीय ब्याटन प्रयोग गरेको थियो। उक्त घटनामा विद्यार्थी तथा सुरक्षाकर्मी दुवै पक्षका केही व्यक्ति घाइते भएका थिए।
राहुल गान्धीको माग : शिक्षामन्त्रीले राजीनामा दिनुपर्छ
कांग्रेस नेता राहुल गान्धीले बुधबार पत्रकार सम्मेलन गर्दै शिक्षामन्त्री धर्मेन्द्र प्रधानले नैतिक जिम्मेवारी लिएर राजीनामा दिनुपर्ने बताएका छन्।
उनले “धर्मेन्द्र प्रधानले देश र विश्वलाई आफू शिक्षा प्रणाली सञ्चालन गर्न असक्षम रहेको देखाइसकेका छन्। उनी पदमा बसिरहन मिल्दैन,” भने।
गान्धीले आन्दोलनरत विद्यार्थीमाथि लाठीचार्ज गर्ने प्रहरीमाथि पनि कारबाही हुनुपर्ने र प्रधानमन्त्री मोदीले विद्यार्थीसँग सार्वजनिक रूपमा माफी माग्नुपर्ने माग गरेका छन्।
‘१० वर्षमा १५२ पटक पेपर लिक’ दाबी
राहुल गान्धीले सन् २०१४ यता भारतीय जनता पार्टी (भाजपा) नेतृत्वको सरकार बनेपछि १५२ वटा प्रश्नपत्र चुहावटका घटना भएको दाबी गरेका छन्। उनका अनुसार यसबाट करिब ७ करोड ५० लाख विद्यार्थी प्रभावित भएका छन्।
यद्यपि, केन्द्रीय स्वास्थ्यमन्त्री जेपी नड्डाले उक्त विषय अनुसन्धानको क्रममा रहेको भन्दै छानबिन पूरा भएपछि सरकारले सत्यतथ्य सार्वजनिक गर्ने बताएका छन्।
