नेपाली शेयर बजार मंगलबार ओरालो लाग्यो। कारोबार रकमसँगै नेप्से परिसूचक पनि घटेको छ। अघिल्लो दिनको तुलनामा नेप्से ३.९० अंकले घटेर २६५४ विन्दुमा झरेको हो। कारोबार रकम उल्लेख्य रूपमा घट्दै अघिल्लो दिनको १३ अर्ब १८ करोड रुपैयाँबाट घटेर आज ७ अर्ब ६५ करोड रुपैयाँमा सीमित भएको छ।
आजको कारोबारमा ९९ कम्पनीको मूल्य बढेको भए पनि १४८ कम्पनीको मूल्य घट्यो। सूचकका हिसाबले माइक्रोफाइनान्स समूहमा लगानीकर्ताको आकर्षण देखिएको छ, जुन १.१० प्रतिशतले उकालो लाग्यो। त्यस्तै, हाइड्रोपावर ०.२७ प्रतिशत र व्यापार समूह ०.११ प्रतिशतले वृद्धि भए। बाँकी सबै समूहका सूचक भने रातो भएका छन्। बैंकिङ ०.४५, विकास बैंक ०.२०, फाइनान्स ०.४९, होटल तथा पर्यटन १.५८, लगानी ०.४३, जीवन बीमा ०.४७, उत्पादन तथा प्रशोधन ०.१४, निर्जीवन बीमा ०.२५ तथा अन्य समूह ०.१५ प्रतिशतले घटे।
कम्पनीगत रुपमा पियोर इनर्जीको मूल्य १० प्रतिशतले बढेर सर्वाधिक वृद्धि हुने कम्पनी बन्यो। त्यस्तै, बुटवल पावर ७.७३, सामुदायिक लघुवित्त ७.१३, अपर हेवाखोला ५.२८ र विन्ध्यवासिनी हाइड्रोपावर ५.१६ प्रतिशतले बढे। मूल्य घट्ने कम्पनीहरूमा गार्डियन माइक्रोलाइफ इन्स्योरेन्स, नारायणी डेभलपमेन्ट बैंक, सिन्धु विकास बैंक र क्रेस्ट माइक्रोलाइफ इन्स्योरेन्स प्रमुख रहे।
आज धेरै कारोबार भएका कम्पनीहरूको सूचीमा सानिमा माइ हाइड्रोपावर, बुटवल पावर, ङादी ग्रुप, राधि विद्युत् र सोल्टी होटल क्रमशः अगाडि देखिए। बजारमा लगानीकर्ताको विश्वासमा केही ह्रास आएको देखिएको छ, जसको असर कारोबार र सूचकमा देखिएको हो।
