सुनसरीको देवानगञ्ज गाउँपालिका–३ कप्तानगञ्जमा गत साउन १० गते दुई समुदायबीच भएको झडपका क्रममा प्रहरीले चलाएको गोली लागेर घाइते भएका अर्का एक युवाको पनि मृत्यु भएको छ। उपचारका क्रममा देवानगञ्ज–३ का २१ वर्षीय रवीन्द्रकुमार मेहता को मंगलबार बिहान निधन भएसँगै उक्त घटनामा ज्यान गुमाउनेको संख्या तीन पुगेको छ।
जिल्ला प्रहरी कार्यालय सुनसरीका प्रहरी उपरीक्षक पुष्पराज मल्ल का अनुसार रवीन्द्रको काठमाडौंस्थित शिक्षण अस्पतालमा उपचारका क्रममा मृत्यु भएको हो। "हामीले पनि भर्खरै उहाँको मृत्यु भएको जानकारी पाएका छौं," उनले बताए।
रवीन्द्रलाई झडपका क्रममा बायाँ तिघ्रामा गोली लागेको थियो। प्रारम्भिक उपचार विराट नर्सिङ होममा गरिएपछि थप उपचारका लागि उनलाई गत शुक्रबार काठमाडौंको शिक्षण अस्पताल लगिएको थियो। उपचारकै क्रममा उनको बायाँ खुट्टा काट्नुपरेको थियो। गम्भीर अवस्थामै उपचार भइरहेका बेला मंगलबार बिहान उनको निधन भएको हो।
यसअघि सोही घटनामा गोली लागेर देवानगञ्ज–४ का २५ वर्षीय ओमप्रकाश मेहता को घटनाकै दिन मृत्यु भएको थियो भने देवानगञ्ज–३ का २२ वर्षीय जयप्रकाश मेहता को उपचारका क्रममा विराटनगरस्थित न्युरो अस्पतालमा निधन भएको थियो।
सरकार र आन्दोलनरत पक्षबीच भएको सातबुँदे सहमति पछि गत शुक्रबार दुवै मृतकको शव गोली चलेको स्थानमै अन्त्येष्टि गरिएको थियो।
यसै घटनाको विरोधमा सिरहाको गोलबजारमा भएको प्रदर्शनका क्रममा प्रहरीले चलाएको गोली लागेर गणेश यादव को पनि मृत्यु भएको थियो, जसले मधेस क्षेत्रमा तनाव थप बढाएको थियो।
अझै सात जना उपचाररत
देवानगञ्ज गोलीकाण्डमा घाइते भएका अन्य सात जनाको विभिन्न अस्पतालमा उपचार भइरहेको छ।
काठमाडौंस्थित ट्रमा सेन्टरमा उपचाररत देवानगञ्ज–३ का १८ वर्षीय अमित यादव को हात र कोखमा गोली लागेको छ। उनलाई नोबेल शिक्षण अस्पतालबाट नेपाली सेनाको स्काई ट्रकमार्फत काठमाडौं ल्याइएको थियो।
त्यसैगरी विराटनगरस्थित न्युरो अस्पतालमा मिथिलेश मेहता (१८), हरेराम यादव (२२) र अमलेश मेहता (१८) उपचाररत छन्। मिथिलेशको पेटमा गोली लाग्दा आन्द्रा बाहिर निस्किएको थियो र उनको शल्यक्रिया गरी गोली निकालिएको छ। हरेरामको तिघ्राको माथिल्लो भागमा तथा अमलेशको बायाँ पिठ्युँमा गोली लागेको प्रहरीले जनाएको छ।
विराट नर्सिङ होममा सुनील मेहता (२५), अमितकुमार यादव (१८) र सुनील मेहता (२६) को उपचार भइरहेको छ। उनीहरूमध्ये अमितकुमारको कम्मर, २६ वर्षीय सुनीलको बायाँ कुहिना र २५ वर्षीय सुनीलको खुट्टामा गोली लागेको छ।
देवानगञ्ज गोलीकाण्डपछि मधेसका विभिन्न जिल्लामा आन्दोलन, विरोध प्रदर्शन र सुरक्षा व्यवस्थालाई लिएर चासो बढेको छ। घटनाको निष्पक्ष छानबिन, दोषीमाथि कारबाही तथा पीडित परिवारलाई न्याय दिलाउनुपर्ने माग अझै जारी रहेको छ।
