विश्वकै ठूलो सामाजिक सञ्जाल कम्पनी मेटाले आफ्ना प्लेटफर्म फेसबुक, इन्स्टाग्राम, ह्वाट्सएप र मेसेन्जरमा समग्र दैनिक सक्रिय प्रयोगकर्ताको सङ्ख्या करिब २० मिलियन (२ करोड) ले घटेको स्वीकार गरेको छ।
कम्पनीले सार्वजनिक गरेको पछिल्लो त्रैमासिक प्रतिवेदनअनुसार ‘फेमिली डेली एक्टिभ पिपल (Family Daily Active People)’ समूहमा यो गिरावट देखिएको हो। यो मेटाका सबै एपहरूमा एकैदिन प्रयोग गर्ने कुल प्रयोगकर्तालाई जनाउने सूचक हो।
मेटाका अनुसार यो गिरावट आंशिक रूपमा केही देशहरूमा इन्टरनेट अवरोध तथा प्रतिबन्धका कारण भएको हो। तर विज्ञहरूले भने प्रयोगकर्ता अनुभव र फिडको गुणस्तरमा आएको गिरावटलाई मुख्य कारणका रूपमा औंल्याएका छन्।
पछिल्ला महिनाहरूमा प्रयोगकर्ताहरूले फेसबुक र इन्स्टाग्रामको फिड ‘अव्यवस्थित’ बन्दै गएको गुनासो गर्दै आएका छन्। धेरै विज्ञापन, अनावश्यक सुझाव (suggested content) र दोहोरिएका पोस्टका कारण आफ्ना साथीभाइका वास्तविक पोस्ट हराउँदै गएको उनीहरूको भनाइ छ।
प्रयोगकर्ताहरूका अनुसार फिडमा करिब प्रत्येक तेस्रो पोस्ट विज्ञापन वा असम्बन्धित सामग्री हुने गरेको छ, जसले अनुभव कमजोर बनाएको छ। कतिपयले फेसबुकलाई अब मुख्यतः मेसेजिङ र ग्रुप च्याटका लागि मात्र उपयोगी भएको टिप्पणी गरेका छन्।
यस अवस्थापछि मेटाले इन्स्टाग्राम र फेसबुकको सिफारिस प्रणाली (algorithm) सुधार गर्ने घोषणा गरेको छ। कम्पनीले अब मौलिक सामग्रीलाई प्राथमिकता दिने र बिना उल्लेखनीय परिवर्तन पुनःपोस्ट गरिएका सामग्रीको पहुँच घटाउने जनाएको छ।
त्यस्तै, फेसबुक र इन्स्टाग्राम दुवैमा फिड सुधारका लागि एल्गोरिदम परिमार्जन गर्ने तयारी भइरहेको बताइएको छ। यद्यपि यी परिवर्तनले प्रयोगकर्ताको अनुभवमा कस्तो असर पार्नेछ भन्ने कुरा अझै स्पष्ट भएको छैन।
विश्लेषकहरूका अनुसार प्रयोगकर्ता घट्नुको कारण केवल बाह्य अवरोध मात्र नभई प्लेटफर्मप्रतिको असन्तुष्टि र ‘फिड गुणस्तरमा गिरावट’ पनि प्रमुख कारक हो।
हाल मेटाले भने प्रयोगकर्ता गिरावटलाई एक चेतावनी (wake-up call) का रूपमा लिँदै दीर्घकालीन सुधारमा ध्यान केन्द्रित गरिरहेको जनाएको छ।
