प्रतिनिधि सभा समानुपातिक निर्वाचन प्रणालीतर्फ राष्ट्रिय स्वतन्त्र पार्टी (रास्वपा) ले बारा जिल्लाका चारवटै निर्वाचन क्षेत्रमा उल्लेख्य अग्रता कायम गरेको प्रारम्भिक मतपरिणामले देखाएको छ। नयाँ शक्तिको रूपमा उदाएको रास्वपाको चुनाव चिह्न ‘घण्टी’ले जिल्लाभर मतदाताबाट व्यापक समर्थन पाउँदा नेपाली कांग्रेस, नेकपा (एमाले) र जनता समाजवादी पार्टी, नेपाल (जसपा) जस्ता स्थापित दलहरू दोस्रो र तेस्रो स्थानका लागि प्रतिस्पर्धामा सीमित देखिएका छन्।
क्षेत्रगत मत विवरण
बारा निर्वाचन क्षेत्र नं. १
यस क्षेत्रमा रास्वपाले ४२ हजार १७१ मत प्राप्त गर्दै स्पष्ट अग्रता बनाएको छ। नेपाली कांग्रेस १२ हजार २४५ मतसहित दोस्रो स्थानमा रहँदा नेकपा (एमाले) ९ हजार ९३३ मतसहित तेस्रो स्थानमा छ। जसपा नेपालले २ हजार ६२६ मत प्राप्त गरेको छ।
बारा निर्वाचन क्षेत्र नं. २
क्षेत्र नम्बर २ मा पनि रास्वपाको दबदबा कायम रहेको छ। यहाँ रास्वपाले ३९ हजार ६१९ मत प्राप्त गरेको छ। जसपा नेपाल ११ हजार ९०९ मतसहित दोस्रो स्थानमा रहँदा नेपाली कांग्रेस १० हजार ३३० मतसहित तेस्रो स्थानमा छ। नेकपा (एमाले) ले ६ हजार ३५६ मत ल्याएको छ।
बारा निर्वाचन क्षेत्र नं. ३
तेस्रो निर्वाचन क्षेत्रमा रास्वपाले ४३ हजार ८५६ मत बटुलेको छ। नेपाली कांग्रेस ८ हजार २४२ मतसहित दोस्रो स्थानमा छ भने जसपा नेपाल ५ हजार ७४२ मतसहित तेस्रो स्थानमा रहेको छ। नेकपा (एमाले) ले ५ हजार ७७ मत प्राप्त गरेको छ।
बारा निर्वाचन क्षेत्र नं. ४
यस क्षेत्रमा रास्वपाले सबैभन्दा बढी ५० हजार ४२१ मत प्राप्त गर्दै बलियो अग्रता बनाएको छ। यहाँ नेकपा (एमाले) ८ हजार ९८४ मतसहित दोस्रो स्थानमा छ भने नेपाली कांग्रेस ५ हजार १८ मतसहित तेस्रो स्थानमा झरेको छ। जसपा नेपालले ४ हजार ४७ मत प्राप्त गरेको छ।
प्रारम्भिक मतपरिणामले बारामा समानुपातिकतर्फ रास्वपाले अन्य दलहरूमाथि स्पष्ट वर्चस्व कायम गरेको देखिन्छ। जिल्लामा परम्परागत राजनीतिक शक्तिहरूलाई पछि पार्दै रास्वपा बलियो विकल्पका रूपमा उदाएको विश्लेषण गरिएको छ।
यसैबीच जनमत पार्टी र राष्ट्रिय परिवर्तन पार्टी जस्ता साना दलहरूले पनि विभिन्न क्षेत्रमा उल्लेख्य मत प्राप्त गरेका छन्।
