नेपाल–भारतबीच सञ्चार सहकार्यलाई सुदृढ बनाउने उद्देश्यले नेपाल–भारत क्रस बोर्डर मिडिया कन्क्लेभ २०२५ वीरगञ्जमा सम्पन्न भएको छ।
मिडिया फर बोर्डर हार्मोनी, नेपालको अध्यक्ष अनिल तिवारीको अध्यक्षतामा भिष्वा होटलमा भएको उद्घाटन कार्यक्रममा दुवै देशका पत्रकार, सम्पादक, नीतिनिर्माता तथा सञ्चारकर्मीहरूको उल्लेख्य उपस्थिति रहेको थियो।
कार्यक्रमका प्रमुख अतिथि सांसद अजय चौरासियाले नेपाल–भारतबीचको सांस्कृतिक, भाषिक र सामाजिक सम्बन्धलाई पत्रकारिताले अझ मजबुत बनाउनुपर्ने आवश्यकता औंल्याउँदै यस्तो प्रकारको कन्क्लेभले दुवै मुलुकबीच विश्वास र आपसी समझदारी बढाउन योगदान दिने विश्वास व्यक्त गरे।
विशेष अतिथिहरूमध्ये राष्ट्रिय समाचार समिति (रासस) का अध्यक्ष धर्मेन्द्र झा, पूर्वराजदूत विजय कान्त कर्ण, नेपाल पत्रकार महासंघ मधेस प्रदेश अध्यक्ष श्याम बन्जारा, वरिष्ठ पत्रकार जगदिश शर्मा र नेपाल पत्रकार महासंघका महासचिव अशोक तिवारीलगायत सहभागी थिए।
आयोजकका अनुसार नेपाल–भारतका करिब ८० भन्दा बढी पत्रकार तथा सञ्चार क्षेत्रका विज्ञहरूको सहभागितामा सुरु भएको यो कन्क्लेभले नेपाल–भारत मिडिया नेटवर्क स्थापना गर्ने बाटो खोल्ने र दीर्घकालीन सहकार्यलाई संस्थागत गर्ने अपेक्षा गरिएको छ।
साझा घोषणा पत्रका मुख्य बुँदाहरू
१. दुवै देशका साझा मुद्धा पहिचान गरी सम्बोधन गराउन सरकार र सम्बन्धित निकायसँग पहल गर्ने।
२. मिसइन्फर्मेसन (गलत सूचना) र डिसइन्फर्मेसन (दुष्प्रचार) बाट मिडियालाई सुरक्षित राख्दै तथ्यपूर्ण रिपोर्टिङमा सक्रिय रहने।
३. व्यवसायिक पत्रकारिताबाट सर्वसाधारणका समस्यालाई सम्बोधन गर्ने, वैकल्पिक मिडिया, सामाजिक सञ्जाल र एआईको प्रयोगमा सचेत हुने।
४. दुवै देशका नागरिकका वास्तविक समस्यालाई फिल्ड रिपोर्टिङमार्फत उजागर गर्ने।
५. आवश्यकताअनुसार सीमावर्ती क्षेत्रमा संयुक्त रिपोर्टिङ गरेर नागरिकको हित रक्षामा योगदान दिने।
६. मिडिया फर बोर्डर हार्मोनी सञ्जाल मार्फत दुई देशबीचको सम्बन्ध सुदृढ गर्ने।
७. द्वन्द्व वा वैमनश्यता उत्पन्न गर्नसक्ने खालका रिपोर्टिङबाट परहेज गर्ने।
८. दुवै देशका पत्रकारले समय समयमा संयुक्त भ्रमण गरेर समाचारजन्य विषयका सन्दर्भमा ऐतिहासिक र सांस्कृतिक गतिविधि बुझ्ने र प्रवर्द्धन गर्ने।
९. समाज रूपान्तरण सम्बन्धी आवश्यक गतिविधि मिडियामार्फत उजागर गर्ने।
१०. दुवै देशका पत्रकारका लागि संयुक्त सूचना केन्द्र स्थापना गर्ने र साझा हेल्पलाइन नम्बर राख्ने।
११. सार्वजनिक सञ्चार संस्थालाई सबल बनाउन प्रयास गर्ने।
१२. सीमाक्षेत्रका पत्रकारको सीप तथा दक्षता अभिवृद्धिका लागि तालिम, गोष्ठी र कार्यशाला आयोजना गर्ने।
१३. सीमा क्षेत्रमा कार्यरत पत्रकारको सुरक्षामा सरकारलाई संवेदनशील हुन आग्रह गर्ने।
१४. सीमा सम्बन्धी प्रभावकारी रिपोर्टिङका लागि सूचना बैंक र सशक्त स्रोत संयन्त्र विकास गर्ने।
१५. आवश्यकताअनुसार पत्रकारहरुको अध्ययन भ्रमणको व्यवस्था मिलाउन पहल गर्ने।
१६. विचार, अभिव्यक्ति र प्रेस स्वतन्त्रताको संरक्षण तथा प्रवर्द्धनमा पहल गर्ने।
१७. कार्यक्रम आयोजना गर्ने आयोजकलाई धन्यवाद ज्ञापन गर्ने।
यस कन्क्लेभले नेपाल–भारत सीमावर्ती क्षेत्रमा पत्रकारिताको गुणस्तर सुधार्दै दुई देशबीच सहयोग र समझदारीलाई अझ सुदृढ गर्ने अपेक्षा गरिएको छ।
