नेशन्स लिगको फाइनलमा आइतबार क्रिस्टियानो रोनाल्डोको पोर्चुगल र लामिन यामालको स्पेन एकअर्काविरुद्ध प्रतिस्पर्धा गर्दै छन्। यो खेल नयाँ पुस्ताका सुपरस्टार यामाल र विश्व फुटबलका दिग्गज रोनाल्डोबीचको पहिलो आमनेसामने भिडन्त पनि हो।
"पुस्ताहरु परिवर्तन भइरहेका छन्। एउटा पुस्ता आउँदैछ, अर्को बिदा हुँदैछ," ४० वर्षीय रोनाल्डोले भने, "यदि तपाईं मलाई नयाँ पुस्ताको प्रतिनिधि होइन भन्नुहुन्छ भने त्यो तपाईंको विचार हो। तर म यामालमाथि कुनै दबाब दिन चाहन्न। उहाँसँग गज्जबको प्रतिभा छ।"
यामालले पनि रोनाल्डोप्रति सम्मान प्रकट गर्दै भने, "उहाँ फुटबलका एक जीवित किंवदन्ती हुनुहुन्छ। यस्ता खेलमै आफूलाई प्रमाणित गर्न चाहन्छु।"
फाइनल म्याच जर्मनीको म्युनिखमा हुनेछ। दुबै खेलाडीले सेमिफाइनलमा गोल गरेका थिए – यामालले फ्रान्सविरुद्ध २ गोल गर्दा, रोनाल्डोले जर्मनीविरुद्ध निर्णायक गोल गरेका थिए।
यामालको तेज सुरुआत
१७ वर्ष नपुग्दै यामालले स्पेनसँग युरो जितिसकेका छन्, बार्सिलोनाका लागि दुई ला लिगा उपाधि र कोपा डेल रे पनि जितिसकेका छन्। क्लबका लागि १०६ खेल खेलिसकेका उनले २५ गोल र १८ असिस्ट गरेका छन्। राष्ट्रिय टोली स्पेनका लागि २० खेलमा ६ गोल र ९ असिस्ट छन्।
उनले युरोपियन च्याम्पियनसिप, च्याम्पियन्स लिग र नेशन्स लिगको सेमिफाइनलमा गोल गरेका छन्। एल क्लासिकोमा पनि उनले रियल म्याड्रिडविरुद्ध ४ गोल गरिसकेका छन्।
रोनाल्डोको अतुलनीय दीर्घायता
तर दीर्घकालीन सफलताको कुरामा रोनाल्डो अझै अजेय देखिन्छन्। ४० वर्षको उमेरमा पनि उनी पोर्चुगल र क्लब दुबैतर्फ निरन्तर गोल गरिरहेका छन्। हालसम्म उनले २२० खेलमा १३७ अन्तर्राष्ट्रिय गोल गरेका छन्, जुन पुरुष फुटबलमा कीर्तिमानी हो।
कुल ९३७ करियर गोल गरिसकेका रोनाल्डो दुई वर्षभित्र १,००० गोल पुर्याउने लक्ष्यमा छन्। २०२२–२३ सिजनमा उनले १७ गोल गरेका थिए, जुन पछिल्लो १९ वर्षमा उनको सबैभन्दा कम स्कोरिङ सिजन हो।
जब यामाल जन्मिए (जुलाई २००७), रोनाल्डोसँग पहिले नै ४६ अन्तर्राष्ट्रिय क्याप थिए। उनले बलोन डि’ओर जितिसकेका थिए, च्याम्पियन्स लिग जितिसकेका थिए र म्यानचेस्टर युनाइटेडबाट रियल म्याड्रिडमा £८० मिलियनमा स्थानान्तरण भइसकेका थिए – जुन त्यो बेला विश्वकै सबैभन्दा महंगो ट्रान्सफर थियो।
साँच्चै भन्ने हो भने, रोनाल्डोका छोरा क्रिस्टियानो जुनियर यामालभन्दा तीन वर्षमात्रै कान्छा छन्।
आजको फाइनल केवल उपाधिको होड मात्र होइन, पुरानो र नयाँ पुस्ताबीचको भावनात्मक भिडन्त पनि हुनेछ।
