अमेरिकाका राष्ट्रपति डोनाल्ड ट्रम्प र विश्वकै धनी व्यक्ति एलन मस्कबीचको सम्बन्धमा चिसोपन चुलिएको छ। ट्रम्पले मस्कका कम्पनीहरूलाई दिइने सरकारी ठेक्का काट्ने धम्की दिएपछि मस्कले ट्रम्पविरुद्ध महाभियोगको सुझाव दिएका छन्। यससँगै यी पूर्वसहयोगीबीचको सम्बन्ध एकाएक टुटेको देखिएको छ।
ट्रम्पले बिहीबार ह्वाइट हाउसमा पत्रकारहरूसँग कुरा गर्दै भने, ‘म एलनसँगको सम्बन्धबाट धेरै निराश छु। राम्रो सम्बन्ध थियो, अब रहनेछ कि छैन, थाहा छैन।’
यता मस्कले पनि ट्रम्पको टिप्पणीका प्रत्यक्ष प्रतिक्रियामा आफ्नो सामाजिक सञ्जाल ‘X’ मार्फत लेखे: “मेरो सहयोग बिना ट्रम्पले निर्वाचन जित्न सक्दैनथे।” उनले अघिल्लो निर्वाचनमा ट्रम्प र रिपब्लिकन उम्मेदवारहरूलाई ३ सय मिलियन डलर सहयोग गरेका थिए।
सरकारी कार्यक्रम र व्यापारमा प्रभाव
ट्रम्पको चेतावनीपछि मस्कले प्रतिक्रिया दिँदै आफ्नो अन्तरिक्ष कम्पनी स्पेसX अन्तर्गतको ‘ड्र्यागन’ यानलाई विस्थापित गर्ने घोषणा गरे। ड्र्यागन अमेरिकी अन्तरिक्ष स्टेशनमा मानव पठाउन सक्षम एक मात्र यान हो। यद्यपि उनले बिहीबार साँझ उक्त धम्की फिर्ता लिएका छन्।
विवादको मूल कारण
ट्रम्पले अघि सारेको “बिग, ब्यूटिफुल बिल” भन्ने विधेयकलाई मस्कले "घिनलाग्दो कुरूपता" भन्दै आलोचना गरेपछि दुवैबीचको टकराव सुरु भएको हो। मस्कले उक्त विधेयकले ३६.२ ट्रिलियन डलर ऋणमा रहेको अमेरिकाको अर्थतन्त्रमा थप बोझ पार्ने बताएका छन्।
ट्रम्प र मस्कबीचको चिसोपनले रिपब्लिकन पार्टीमै भित्रि विवाद बढाएको छ। राजनीतिक विश्लेषकहरूका अनुसार यो विवादले आउँदो मध्यावधि निर्वाचनमा रिपब्लिकनहरूलाई घाटा पुग्न सक्छ।
मिलनको संकेत?
विवाद उत्कर्षमा पुगेकै बेला अमेरिकी लगानीकर्ता बिल एकम्यानले दुवैबीच मेलमिलापको सुझाव दिएपछि मस्कले छोटो प्रतिक्रिया दिए— "तपाईं गलत होइन।" यो अभिव्यक्तिलाई संभावित मेलमिलापको संकेतका रूपमा हेरिएको छ।
तर मस्कले यसअघि नै आफ्नो राजनीतिक खर्च घटाउने घोषणा गरिसकेका छन्। उनले “नोभेम्बरमा, जसले जनतालाई धोका दिए, तिनीहरूलाई हटाउँछौं,” भन्ने अभिव्यक्ति पनि सार्वजनिक गरेका थिए।
