पाकिस्तानको उत्तरपश्चिमी सहर पेशावरमा विद्यालयको छत खस्दा कम्तीमा २८ विद्यार्थी र एक शिक्षक गरी २९ जनाको मृत्यु भएको छ। घटनामा दर्जनौँ विद्यार्थी घाइते भएका छन् भने भग्नावशेषमा पुरिएका अन्यको खोजी तथा उद्धार कार्य जारी छ।
बिहीबार बिहान पेशावरस्थित अल खैर एजुकेसन सेन्टरमा उक्त दुर्घटना भएको हो। दुईतले विद्यालय भवनको माथिल्लो तलाको छत खसेपछि तल्लो तलासमेत भत्किएको थियो। घटनाका बेला विद्यार्थीहरू कक्षाकोठामा अध्ययन गरिरहेका थिए।
स्थानीय उद्धार सेवाका अधिकारीहरूका अनुसार दुर्घटनापछि उद्धारकर्मी तथा स्थानीय बासिन्दा घटनास्थलमा पुगेका थिए। भग्नावशेषमा पुरिएका विद्यार्थीको उद्धार गर्न सुरक्षाकर्मी र स्थानीयवासीले संयुक्त रूपमा काम गरिरहेका छन्। साँघुरा सडकका कारण उद्धारका लागि आवश्यक भारी उपकरण घटनास्थलसम्म पुर्याउन कठिनाइ भएको जनाइएको छ।
लेडी रिडिङ अस्पतालका प्रवक्ता मोहम्मद आसिमका अनुसार घाइतेमध्ये केहीको अवस्था गम्भीर छ। घाइतेको उपचारका लागि अस्पतालले आपत्कालीन सेवा सक्रिय गरेको छ। घटनामा मृत्यु हुने तथा घाइते हुने अधिकांश बालबालिका १३ वर्ष वा सोभन्दा कम उमेरका रहेको समाचारमा उल्लेख छ।
प्रहरी अधिकारीहरूले विद्यालय भवनको संरचना कमजोर रहेको र छतमा थप भार परेको हुन सक्ने प्रारम्भिक आशंका गरेका छन्। तर दुर्घटनाको वास्तविक कारण पत्ता लगाउन अनुसन्धान सुरु गरिएको छ।
पाकिस्तानका राष्ट्रपति आसिफ अली जरदारीले घटनाप्रति दुःख व्यक्त गर्दै दुर्घटनाको विस्तृत छानबिन गर्न आग्रह गरेका छन्। उनले प्रभावित परिवारप्रति समवेदना व्यक्त गरेका छन्।
पाकिस्तानमा भवन निर्माणसम्बन्धी मापदण्डको प्रभावकारी कार्यान्वयन नहुँदा यस्ता दुर्घटना दोहोरिने गरेको भन्दै विद्यालय तथा अन्य भवनको सुरक्षामाथि प्रश्न उठ्दै आएको छ। यसअघि जुलाईमा लाहोरस्थित एक ट्युसन सेन्टरको छत खस्दा कम्तीमा १४ बालबालिकाको मृत्यु भएको थियो।
