फ्रान्स तथा रियल म्याड्रिडका स्टार खेलाडी किलियन एम्बाप्पेले आफू सन् २०१६ मा लिभरपुलमा आबद्ध हुन निकै नजिक पुगेको खुलासा गरेका छन्।
त्यतिबेला १८ वर्षका एम्बाप्पे फ्रान्सेली क्लब मोनाकोबाट खेलिरहेका थिए। लिभरपुलले उनलाई अनुबन्ध गर्न विशेष प्रयास गरेको थियो। तत्कालीन लिभरपुल प्रशिक्षक योर्गेन क्लोपका अनुसार क्लबले एम्बाप्पे र उनको परिवारलाई फ्रान्स लैजान निजी विमानसमेत व्यवस्था गरेको थियो।
द एथलेटिकसँगको कुराकानीमा एम्बाप्पेले उनकी आमाको रोजाइ भने लिभरपुल रहेको बताए। उनकी आमालाई प्रशिक्षक क्लोप निकै मन पर्ने र एम्बाप्पेले लिभरपुलबाट खेल्नुपर्ने चाहना रहेको उनले बताए।
एम्बाप्पेका अनुसार उनकी आमा वार्ता सुरु गर्न लिभरपुल पुगेकी थिइन्। उनले एनफिल्ड भ्रमण गर्नुका साथै क्लबका अधिकारीहरूसँग भेट गरेकी थिइन्। रंगशालाको वातावरण र क्लबको पारिवारिक माहोलबाट उनी निकै प्रभावित भएको एम्बाप्पेले बताए।
‘मेरी आमाले लिभरपुल निकै मन पराउनुभएको थियो। उहाँले मलाई एनफिल्डमा खेलेको कल्पना गर्नुभएको थियो,’ एम्बाप्पेले भने।
तर एम्बाप्पेले आमाको सल्लाह मानेनन्। पेरिसमै जन्मिएर हुर्किएका उनले आफ्नो देश छाड्नुअघि आफ्नै सहरमा आफूलाई प्रमाणित गर्न चाहेको बताए।
क्लोपले पनि सन् २०२६ को विश्वकपका क्रममा एम्बाप्पेलाई अनुबन्ध गर्ने प्रयासबारे बताएका थिए। उनका अनुसार लिभरपुलले ब्ल्याकपुलबाट फ्रान्सको निससम्म निजी विमान पठाएको थियो। एम्बाप्पेको परिवारलाई विमानमा ल्याएर क्लबले उनीहरूसँग छलफल र खानाको समेत व्यवस्था गरेको थियो। तर अन्ततः सम्झौता हुन सकेन।
त्यसपछि एम्बाप्पे लिभरपुलको सट्टा पेरिस सेन्ट-जर्मेन (पीएसजी) पुगे। उनी लोनमार्फत पीएसजीमा आबद्ध भएका थिए, जसमा पछि स्थायी स्थानान्तरणका लागि १८ करोड युरोको विकल्प समावेश थियो।
पीएसजीमा सात वर्ष बिताएका एम्बाप्पे क्लबका सर्वाधिक गोलकर्ता बने। सन् २०२४ मा उनी स्पेनिस क्लब रियल म्याड्रिडमा आबद्ध भएका थिए।
