भारतको बिहारस्थित कैमूर जिल्लामा एक अत्यन्तै सनसनीपूर्ण घटना सार्वजनिक भएको छ। रामगढ थाना क्षेत्रअन्तर्गत चौरसिया पुलमुनि दुर्गावती नदीको किनारमा दुईवटा बेवारिसे सुटकेस फेला परेपछि स्थानीय क्षेत्रमा त्रास फैलिएको छ।
आइतबार बिहान नदी किनारमा दुर्गन्ध आएपछि स्थानीय बासिन्दा त्यहाँ पुगेका थिए। त्यस क्रममा नदीमा शंकास्पद अवस्थामा दुई सुटकेस बगिरहेको देखेपछि प्रहरीलाई जानकारी गराइएको थियो। सुटकेस खोल्दा मानव शरीरका अंगहरू फेला परेपछि घटना झनै गम्भीर बनेको हो।
प्रहरीका अनुसार प्रारम्भिक रूपमा ती अवशेषहरू एक बालक र एक वयस्क व्यक्तिका हुन सक्ने अनुमान गरिएको छ। शव निकै सडिसकेको अवस्थामा रहेकाले पहिचानमा कठिनाइ भइरहेको छ।
घटनाको सूचना पाएलगत्तै रामगढ थानाको प्रहरी टोली घटनास्थल पुगेर क्षेत्रलाई सुरक्षित गरेको थियो। कैमूरका प्रहरी उपरीक्षक (एसपी) हरमोहन शुक्ला स्वयं घटनास्थलमा पुगेर अनुसन्धानको निर्देशन दिएका छन्। फरेन्सिक टोलीले आवश्यक नमुना संकलन गर्दै विस्तृत अनुसन्धान सुरु गरेको छ।
एसपी शुक्लाले बताएअनुसार नदीबाट सुटकेसभित्र शरीरका विभिन्न भाग फेला परेका छन्, तर ती धेरै पुरानो अवस्थामा रहेका कारण पहिचान चुनौतीपूर्ण बनेको छ। हालसम्म कुनै पनि प्रहरी कार्यालयमा यस प्रकारको बेपत्ता सम्बन्धी उजुरी नपरेको पनि उनले जानकारी दिए।
प्रहरीले यो घटना योजनाबद्ध हत्या हुन सक्ने आशंका गरेको छ। अपराधीहरूले अन्यत्र हत्या गरी प्रमाण नष्ट गर्ने उद्देश्यले शव टुक्रा पारेर सुटकेसभित्र राखी नदीमा फालेको हुनसक्ने प्रारम्भिक अनुमान गरिएको छ।
मृतकको पहिचानका लागि छिमेकी जिल्लाका प्रहरी कार्यालयहरूमा समेत अलर्ट जारी गरिएको छ। पोस्टमार्टम तथा फरेन्सिक रिपोर्टपछि घटनाको वास्तविक कारण खुल्ने प्रहरीको विश्वास छ। यस घटनाले स्थानीय क्षेत्रमा ठूलो त्रास फैलिएको छ भने अपराधीको खोजीका लागि विशेष अनुसन्धान अभियान सञ्चालन गरिएको छ।
