उत्तर कोरियाका नेता किम जोङ उनले अमेरिका–इरानबीचको युद्धले आफ्नो देशले आणविक हतियार कायम राख्ने निर्णय सही भएको बताएका छन् ।
मंगलबार सर्वोच्च जनसभा (सुप्रिम पिपुल्स एसेम्ब्ली) लाई सम्बोधन गर्दै उनले संयुक्त राज्य अमेरिका माथि “राज्य प्रायोजित आतंक र आक्रामकता” को आरोप लगाए । उनले वर्तमान अवस्थाले उत्तर कोरियाले अमेरिकी दबाब र “मीठा आश्वासन” अस्वीकार गर्दै आफ्नो आणविक कार्यक्रम नत्याग्ने निर्णय उचित रहेको स्पष्ट पारेको बताए ।
उनका अनुसार उत्तर कोरियाको आणविक हैसियत अब “अपरिवर्तनीय” भइसकेको छ ।
यसअघि अमेरिकी राष्ट्रपति डोनाल्ड ट्रम्पले इरानबाट “तत्काल खतरा” रहेको दाबी गरेका थिए । उनले केही महिनाअघि अमेरिकाले इरानको आणविक क्षमता “पूर्ण रूपमा ध्वस्त” बनाएको समेत बताएका थिए ।
उत्तर कोरियाली नेतृत्वले इरानसँगको द्वन्द्वलाई आफ्नो दीर्घकालीन धारणा पुष्टि गर्ने घटनाका रूपमा लिएको छ । उनीहरूका अनुसार आणविक हतियार नभएका देशहरू अमेरिकी सैन्य शक्तिको जोखिममा पर्छन्, जबकि आणविक शक्ति भएका राष्ट्रहरूले त्यसलाई रोक्न सक्छन् ।
यसैबीच, ट्रम्पले हालै किमसँग पुनः वार्ता सुरु गर्न सकिने संकेत दिएका छन् । सन् २०१९ मा अवरुद्ध भएको कूटनीतिक प्रक्रिया पुनः सुरु हुन सक्ने चर्चा चलिरहेका बेला यस्तो संकेत आएको हो ।
यस महिनाको सुरुवातमा दक्षिण कोरियाका प्रधानमन्त्री वाशिङ्टन पुगेर ट्रम्पसँग आकस्मिक भेट गरेका थिए । उक्त भेटमा उत्तर कोरियासँग सम्भावित वार्ता, रणनीतिक समन्वय तथा प्योङयाङको हतियार विकासबारे छलफल भएको जनाइएको छ ।
किमका पछिल्ला अभिव्यक्तिले भविष्यका वार्ताहरू अघिल्ला जस्तो नहुने संकेत गरेका छन् । उनले अमेरिका उत्तर कोरियालाई आणविक शक्ति राष्ट्रका रूपमा स्वीकारे र आफ्नो “शत्रुतापूर्ण नीति” त्यागे मात्र वार्तामा बस्न सकिने स्पष्ट पारेका छन् ।
हालै उत्तर कोरियाले नयाँ युद्धपोतबाट क्रुज मिसाइल प्रक्षेपणसहित विभिन्न उच्चस्तरीय हतियार परीक्षण सार्वजनिक गर्दै आफ्नो सैन्य क्षमता प्रदर्शन गर्दै आएको छ ।
-1774256823.jpeg)
-1774256823.jpeg)
