मध्यपूर्वमा तनाव झनै चर्किँदै जाँदा इरानले कतारको प्रमुख ग्यास हबमा मिसाइल आक्रमण गर्दा ठूलो क्षति पुगेको छ भने क्षेत्रका विभिन्न देशमा लगातार ड्रोन र मिसाइल आक्रमण भइरहेका छन्।
स्थानीय समयअनुसार बिहीबार बिहान इरानले कतारस्थित प्रमुख ऊर्जा केन्द्र रस लाफान औद्योगिक शहरमा आक्रमण गर्दा व्यापक क्षति पुगेको छ। विश्वकै सबैभन्दा ठूलो एलएनजी (LNG) उत्पादन केन्द्र मानिने उक्त क्षेत्रमा १२ घण्टाभित्र दुई पटक मिसाइल प्रहार गरिएको कतारको रक्षा मन्त्रालयले जनाएको छ। आक्रमणपछि त्यहाँ भीषण आगलागी भएको र आपतकालीन टोलीहरू उद्धार तथा नियन्त्रणमा खटिएका छन्।
यसअघि पनि इरानले पर्सियन खाडी क्षेत्रका ऊर्जा संरचनामा आक्रमण गरेपछि अन्तर्राष्ट्रिय बजारमा तेलको मूल्य उच्चदरमा बढिरहेको छ।
संयुक्त अरब इमिरेट्स (यूएई) मा अबुधाबीका महत्त्वपूर्ण ऊर्जा केन्द्रहरूमा खसेको मिसाइलको अवशेषका कारण ग्यास उत्पादन अस्थायी रूपमा रोकिएको छ। त्यस्तै, यूएईको पूर्वी तट नजिकै एक जहाजमा अज्ञात वस्तु प्रहार हुँदा आगलागी भएको बेलायती समुद्री व्यापार सञ्चालन (UKMTO) ले जनाएको छ।
साउदी अरेबियाले पूर्वी क्षेत्रमा एक दर्जनभन्दा बढी ड्रोन खसालेर नष्ट गरेको जनाएको छ। केही ड्रोन राजधानी रियाद नजिकै अवरोध गरिएको रक्षा मन्त्रालयले जानकारी दिएको छ।
यता, इजरायलमाथि पनि इरानले मिसाइल र ड्रोनका विभिन्न चरणमा आक्रमण गरेको छ भने लेबनानबाट हेजबुल्लाहले समेत एकसाथ आक्रमण गरेको इरानको अर्ध-सरकारी समाचार एजेन्सीले जनाएको छ। इजरायली सेनाका अनुसार उत्तरतर्फबाट प्रक्षेपण गरिएका मिसाइलहरू पहिचान गरिएको छ। तेल अभिभ क्षेत्रमा भएको आक्रमणमा भने कुनै मानवीय क्षति नभएको प्रहरीले जनाएको छ।
बहराइनमा दुईपटक साइरन बजाइएपछि गृह मन्त्रालयले नागरिकलाई सुरक्षित स्थानमा जान आग्रह गरेको छ।
उता, इरानको राजधानी तेहरानमा रहेको आवासीय क्षेत्रमा हवाई आक्रमण भएको भन्दै इरानी रेड क्रिसेन्टले उद्धार कार्यका दृश्य सार्वजनिक गरेको छ। यसैबीच, दक्षिण पार्स प्राकृतिक ग्यास क्षेत्रमा बुधबार भएको आक्रमणको प्रभाव अझै जारी रहेको जनाइएको छ।
