पूर्वराष्ट्रपति विद्यादेवी भण्डारीले परिवारदेखि समाज रूपान्तरणसम्म महिलाको भूमिका महत्वपूर्ण भए पनि उनीहरूले अझै अपेक्षित सम्मान पाउन नसकेको बताएकी छन्।
वीरगञ्ज उद्योग वाणिज्य संघले आयोजना गरेको ‘वृहत महिला सम्मेलन २०८२’ लाई सम्बोधन गर्दै भण्डारीले समाजका रुढीवादी सोच र गलत परम्पराका कारण महिलामाथि सिर्जना गरिएका अवरोधलाई तोड्दै आत्मविश्वासी ढंगले अगाडि बढ्नुपर्ने आवश्यकता औंल्याइन्।
उनले भनिन्, “हाम्रो समाजमा अझै लैंगिक असमानता, पूर्वाग्रह र अवरोधहरू धेरै छन्। महिलाले आफूलाई आत्मविश्वासी बनाउँदै समाजलाई सकारात्मक चुनौती दिनुपर्छ। महिलाको शक्ति, त्याग र समर्पणलाई संस्थागत रूपमा सम्मान गर्न सकिएन भने दिगो विकास र समृद्ध नेपाल सम्भव हुँदैन।”
भण्डारीले वीरगञ्ज जस्तो व्यापारिक केन्द्रमा महिलाले उद्योग, व्यापार र उद्यमशीलतामा खेलेको अग्रणी भूमिकाले केवल व्यक्तिगत सफलता मात्र नभई राष्ट्रिय अर्थतन्त्रलाई सुदृढ बनाउन योगदान पुर्याउने बताइन्। उनले महिला उद्यमशीलतालाई सम्मान, प्रोत्साहन र आगामी पुस्तालाई प्रेरणा दिनेगरी अघि बढाउनुपर्नेमा जोड दिइन्।
कार्यक्रममा वीरगञ्ज उद्योग वाणिज्य संघका अध्यक्ष हरि गौतमले सम्मेलनमार्फत महिलाको पहिचान बनाउन, आत्मविश्वास बढाउन र नयाँ उद्यमशीलतालाई प्रोत्साहन गर्ने लक्ष्य राखिएको जानकारी दिए। उनले महिलाले भोगिरहेका सामाजिक, आर्थिक, पारिवारिक तथा राजनीतिक अवरोधलाई अवसरमा बदल्ने अभियानका रूपमा यो सम्मेलन पथप्रदर्शक बन्ने विश्वास व्यक्त गरे। साथै, मधेस प्रदेशको पर्सा र बाराका क्षेत्रमा सक्रिय तर ओझेलमा परेका महिला उद्यमीको अनुभव आदान–प्रदानका लागि सम्मेलन सार्थक भएको धारणा राखे।
महिला उद्यमशीलता विकास समितिकी अध्यक्ष डा. लक्ष्मी थापाले “महिला नै महिलाको दुश्मन हुन्छन्” भन्ने धारणालाई उल्ट्याउँदै यस सम्मेलनले महिलामध्ये सहकार्य र सकारात्मक साझेदारीको वातावरण विकास गरेको बताइन्।
सम्मेलनमा गाउँदेखि शहरसम्मका विभिन्न क्षेत्रमा क्रियाशील महिलाहरूको उल्लेखनीय सहभागिता थियो। नेपाल उद्योग वाणिज्य महासंघकी उपाध्यक्ष ज्योत्सना श्रेष्ठ, महासंघअन्तर्गत महिला उद्यम विकास समितिकी सभापति कमला श्रेष्ठ, वरिष्ठ पत्रकार तथा समाजसेवी नम्रता शर्मा, रुपाली पोदार, नारायणी अस्पतालकी नर्सिङ अधिकृत हेमा थापा र नेशनल इन्फोटेककी सञ्चालिका काजल सिंहले पत्रकार कविता खड्काको सहजीकरणमा आफ्ना अनुभव तथा विचार राखेका थिए।
कार्यक्रमको सञ्चालन पत्रकार निलिमा पौडेलले गरेकी थिइन्।
