विश्वप्रसिद्ध पोर्चुगाली फुटबल खेलाडी क्रिस्टियानो रोनाल्डोले आफ्नी लामो समयकी प्रेमिका जर्जिना रोड्रिग्वेजसँग बिवाह गर्ने तयारी गरेका छन्।
३१ वर्षीया रोड्रिग्वेजले सामाजिक सञ्जालमार्फत एक ठुलो औंठीसहितको तस्वीर सार्वजनिक गर्दै आफ्नो मातृभाषा स्पानिसमा "यस जीवनमा र मेरो सबै जीवनमा, म हो भन्छु" भनेर लेखेकी छन्।
हालसम्म रोनाल्डोले औपचारिक रूपमा टिप्पणी गरेका छैनन्। विश्वमै सबैभन्दा धेरै फलोअर भएका इन्स्टाग्राम प्रयोगकर्ता रोनाल्डो र रोड्रिग्वेज करिब नौ वर्षदेखि प्रेम सम्बन्धमा रहेका छन्। उनीहरू सन् २०१६ मा म्याड्रिडस्थित गुच्चीको पसलमा भेटिएका थिए। त्यतिबेला रोनाल्डो स्पेनिस क्लब रियल म्याड्रिडका लागि खेलिरहेका थिए।
रोनाल्डोका पाँच सन्तान छन्, जसमा दुई जना रोड्रिग्वेजसँगको सन्तान हुन्। सन् २०२२ को अप्रिलमा उनीहरूको कान्छी छोरी बेला जन्मिएकी थिइन्, तर सोही समयमा जन्मिएका एक छोरा मृतावस्थामै जन्मिएका थिए। रोड्रिग्वेजले रोनाल्डोका अरू तीन सन्तानको पनि पालनपोषणमा सहयोग गर्दै आएकी छन्।
रोड्रिग्वेजको जीवनशैलीमा आधारित नेटफ्लिक्स रियालिटी शो आई एम जर्जिना मा उनले आफ्नो विवाहबारेको चर्चा खुलाएकी थिइन्। कार्यक्रममा उनले आफ्ना साथीहरूले ‘जेनिफर लोपेजको द रिङ्ग ऑर वेन गीत गाएजस्तो गर्दै’ आफूलाई विवाहबारे जिस्क्याउने गरेको बताएकी थिइन्।
उनको विवाहको खबरमा किम कार्दासियन, पियर्स मोर्गन, चार्लोट टिलबरी, र जेफ बेजोसकी पत्नी लरेन सान्चेज–बेयोसजस्ता चर्चित व्यक्तिहरूले शुभकामना व्यक्त गरेका छन्।
रोनाल्डो र उनको परिवार हाल साउदी अरेबियाको राजधानी रियादमा बसोबास गर्छन्, जहाँ उनी अल-नस्र क्लबका लागि खेल्छन्। उनले सन् २०२२ डिसेम्बरमा वार्षिक करिब £१७७ मिलियन (अन्दाजी २३८ मिलियन अमेरिकी डलर) तलबमा क्लबमा प्रवेश गरेका थिए।
सन् २०२५ जुनमा, ४० वर्षीय रोनाल्डोको करार सन् २०२७ सम्मका लागि नवीकरण गरिएको थियो। सामाजिक सञ्जाल ‘एक्स’ मा उनले लेखेका छन्, “नयाँ अध्याय सुरु हुन्छ। उस्तै जोश, उस्तै सपना। इतिहास सिर्जना गरौं।”
