विश्वकपको तेस्रो स्थानका लागि हुने इंग्ल्यान्ड र फ्रान्सबीचको प्रतिस्पर्धा केवल कांस्य पदकका लागि मात्र सीमित छैन। यो खेलले इंग्ल्यान्डका मुख्य प्रशिक्षक थोमस टुचेलको भविष्य, टोलीभित्रको विश्वास र आगामी यात्रामाथि समेत गहिरो प्रभाव पार्ने अपेक्षा गरिएको छ।
अर्जेन्टिनासँगको सेमिफाइनलमा अग्रता जोगाउन रक्षात्मक रणनीति अपनाएपछि इंग्ल्यान्ड २–१ ले पराजित भएको थियो। उक्त खेलमा टुचेलले पाँच डिफेन्डरसहित पछि छैटौं डिफेन्डर मैदानमा उतारेपछि टोलीले बल नियन्त्रण गुमाएको भन्दै उनको रणनीतिमाथि व्यापक आलोचना भएको छ।
यद्यपि, इंग्लिस फुटबल संघ (एफए) ले हालसम्म टुचेलप्रति विश्वास कायम राखेको छ। स्वयं टुचेलले पनि सन् २०२८ सम्मको आफ्नो कार्यकाल पूरा गर्ने प्रतिबद्धता जनाएका छन्। तर सेमिफाइनलको हारपछि समर्थक, पूर्वखेलाडी, विश्लेषक मात्र होइन, टोलीभित्रका केही वरिष्ठ खेलाडीसमेत उनको निर्णयप्रति असन्तुष्ट रहेको अन्तर्राष्ट्रिय सञ्चारमाध्यमहरूले उल्लेख गरेका छन्।
खेलाडीहरूले आफ्नो प्रदर्शन कमजोर रहेको स्वीकार गरे पनि निर्णायक समयमा अपनाइएको रणनीतिले टोलीको विश्वकप फाइनल पुग्ने सम्भावना समाप्त भएको उनीहरूको बुझाइ रहेको बताइएको छ।
अब मियामीमा हुने फ्रान्सविरुद्धको खेल टुचेलका लागि आफूलाई पुनः प्रमाणित गर्ने अवसरका रूपमा हेरिएको छ। विश्व नम्बर–१ फ्रान्सलाई हराउन सके इंग्ल्यान्डले सन् १९६६ पछि विश्वकपमा आफ्नो उत्कृष्ट नतिजा हासिल गर्नेछ भने फिफा विश्व वरीयतामा पनि उल्लेखनीय सुधार हुने सम्भावना छ।
तर लगातार दोस्रो ठूलो खेलमा पनि पराजय बेहोरे टुचेलमाथि थप दबाब सिर्जना हुने विश्लेषण गरिएको छ। त्यसपछि सेप्टेम्बरमा वेम्बलीमा हुने स्पेनविरुद्धको खेल उनको भविष्यका लागि झन् निर्णायक बन्न सक्ने देखिएको छ।
फ्रान्ससँग किलियन एम्बाप्पे, माइकल ओलिसे र उस्मान डेम्बेलेजस्ता विश्वस्तरीय खेलाडी रहेकाले इंग्ल्यान्डले उत्कृष्ट प्रदर्शन नगरे कठिन परिणाम भोग्नुपर्ने अवस्था आउन सक्छ।
यसअघि सन् १९९० र २०१८ मा तेस्रो स्थानको खेल गुमाएको इंग्ल्यान्ड यसपटक भने जित निकाल्दै विश्वकप अभियान सुखद रूपमा टुंग्याउने लक्ष्यका साथ मैदान उत्रिनेछ।
-1783330225.jpeg)
