पूर्वी फ्रान्सको टोम्ब्लेन सहरमा स्काइडाइभिङका लागि प्रयोग गरिएको एउटा सानो नागरिक विमान दुर्घटनाग्रस्त हुँदा चालकसहित ११ जनाको मृत्यु भएको छ।
स्थानीय अधिकारीहरूका अनुसार विमानमा चालकसहित १० जना यात्रु सवार थिए। मृतकमध्ये पाँच जना स्काइडाइभिङ प्रशिक्षक र पाँच जना पहिलोपटक ट्यान्डम स्काइडाइभ गर्न तयारी गरिरहेका सहभागी थिए।
प्यारासुट प्रशिक्षण विद्यालयद्वारा सञ्चालन गरिएको उक्त विमान नान्सी–एसे विमानस्थलबाट स्थानीय समयअनुसार बिहान करिब ११ बजे उडेको केही समयमै अचानक दुर्घटनाग्रस्त भएको हो।
घटनापछि दुर्घटनाको कारण पत्ता लगाउन पेरिसका सरकारी अभियोजन कार्यालयले अनुसन्धान सुरु गरेको फ्रान्सका गृहमन्त्री लरेन्ट नुनेजले जानकारी दिएका छन्।
उनका अनुसार पहिलोपटक स्काइडाइभ गर्न लागेकाहरूका आफन्त विमानस्थलमा उनीहरूको उफ्राइ हेर्न भेला भएका थिए। दुर्भाग्यवश, उनीहरूले आफ्नै आँखाअगाडि विमान दुर्घटनामा परेर प्रियजन गुमाउनुपरेको थियो।
नजिकैको नान्सी सहरका मेयर माथ्यु क्लाइनले केही पीडितको मृत्यु आफ्ना परिवारका सदस्यहरूको सामुन्ने भएको बताए। मेर्थ–ए–मोसेल विभागकी अध्यक्ष शायनेस खिरौनीले घटनाले परिवारका सदस्यहरूमा गम्भीर मानसिक आघात पुगेको उल्लेख गरिन्।
दुर्घटनास्थल नजिकै पुगेका गृहमन्त्री नुनेजले घटनास्थलमा अत्यन्तै भावुक अवस्था रहेको र पीडित परिवारप्रति सबैले ऐक्यबद्धता जनाइरहेको बताए। उनका अनुसार आफन्त तथा प्रत्यक्षदर्शीलाई सहयोग गर्न चिकित्सकीय तथा मनोवैज्ञानिक सहायता टोली परिचालन गरिएको छ।
विमान विमानस्थलको छेउमा रहेको आवासीय क्षेत्र र किनमेल केन्द्र नजिकै जमिनमा ठोक्किएको थियो। स्थानीय अधिकारीहरूका अनुसार केही मिटर मात्रै फरक परेको भए दुर्घटनाले आसपासका घरहरूमा समेत ठूलो क्षति पुर्याउन सक्थ्यो।
मेर्थ–ए–मोसेलका प्रिफेक्ट इभ सेगुईले विमान लगभग ठाडो रूपमा खसेको र आवासीय बस्तीको अत्यन्तै नजिक दुर्घटना भएको बताए।
स्थानीय नर्सिङ संगठनका अध्यक्ष थियरी पेसेका अनुसार दुर्घटनामा ज्यान गुमाउने स्काइडाइभरमध्ये आधा नर्स थिए। उनीहरू हालको भीषण गर्मीका बीच केही समय मनोरञ्जन र तनाव कम गर्ने उद्देश्यले पहिलोपटक स्काइडाइभ गर्न गएका थिए।
फ्रान्सको विमान सुरक्षा निकाय (बीईए) लाई उद्धृत गर्दै समाचार संस्था एएफपीले यसलाई सैनिक र व्यावसायिक उडानबाहेक फ्रान्सको इतिहासकै सबैभन्दा घातक निजी विमान दुर्घटना भएको जनाएको छ।
प्रत्यक्षदर्शीका अनुसार विमान उडानका क्रममा अचानक दायाँतर्फ मोडिएको देखिएको थियो। त्यसपछि ठूलो आवाज सुनिएको र घटनास्थल पुग्दा विमानमा आगलागी भइसकेको थियो। उनले सबै यात्रुको घटनास्थलमै मृत्यु भएको स्पष्ट देखिएको बताए।
टोम्ब्लेनका मेयर हेर्भे फेरोनले विमान पूर्ण रूपमा अप्रत्याशित ढंगले आकाशबाट खसेको भन्दै दुर्घटनाको कारणबारे अहिले नै निष्कर्ष निकाल्न हतार हुने अवस्था नरहेको बताए।
हालैका दिनमा फ्रान्ससहित युरोपका अधिकांश भाग भीषण गर्मीको चपेटामा परेका छन्। दुर्घटना भएको मेर्थ–ए–मोसेल क्षेत्रमा आइतबार उच्च तापक्रमका कारण 'एम्बर' तहको मौसम चेतावनी जारी गरिएको थियो। यद्यपि, गर्मी वा मौसमले दुर्घटनामा भूमिका खेलेको हो वा होइन भन्नेबारे अनुसन्धान पूरा नभएसम्म केही भन्न नसकिने अधिकारीहरूले बताएका छन्।
