इंग्लिस क्लब चेल्सीले नयाँ प्रशिक्षकका रूपमा स्पेनिस फुटबल व्यक्तित्व जाबी अलोन्सोलाई नियुक्त गर्ने तयारी गरेको छ। एफए कपको फाइनलमा म्यानचेस्टर सिटीसँग १–० ले पराजित भएपछि चेल्सीले नयाँ व्यवस्थापक नियुक्तिको प्रक्रिया तीव्र बनाएको हो।
वेम्बलीमा भएको हारपछि निराश बनेका चेल्सी समर्थकमाझ अलोन्सोको आगमनको खबरले केही आशा जगाएको छ। पूर्व रियल म्याड्रिड र बायर लेभरकुसेनका प्रशिक्षक रहेका ४४ वर्षीय अलोन्सोलाई जुलाई १ देखि लागू हुने गरी अनुबन्ध गर्ने तयारी भइरहेको बताइएको छ।
चेल्सीले एफए कप फाइनलअघि नै प्रशिक्षक लियम रोजेनियरको विकल्प खोजिरहेको थियो। क्लबले फाइनलअघि नयाँ प्रशिक्षक घोषणा गर्दा खेलाडी र स्टाफमा असर पर्न सक्ने भन्दै निर्णय गोप्य राखेको थियो।
अलोन्सोको आगमनलाई समर्थकहरूले उत्साहका साथ हेरे पनि उनीमाथि ठूलो दबाब रहने निश्चित देखिएको छ। चेल्सी प्रिमियर लिगमा दुई खेल बाँकी रहँदा नवौँ स्थानमा छ र युरोपियन प्रतियोगितामा स्थान बनाउने सम्भावना कमजोर बनेको छ।
युइएफए च्याम्पियन्स लिगमा पुग्ने अवसर लगभग समाप्त भइसकेको छ भने युइएफए युरोपा लिगमा स्थान बनाउन पनि कठिन देखिएको छ। युइएफए कन्फ्रेन्स लिगमा पुगे पनि त्यसले क्लबको आर्थिक अवस्था वा समर्थकको अपेक्षा धेरै पूरा नगर्ने विश्लेषण भइरहेको छ।
क्लबभित्र आर्थिक दबाब, खेलाडी व्यवस्थापन र ड्रेसिङ रुमको असन्तुष्टि अलोन्सोका लागि थप चुनौती बनेका छन्। पूर्व प्रशिक्षकको कार्यकालमा केही प्रमुख खेलाडीले खुला असन्तुष्टि व्यक्त गरेका थिए। विशेष गरी स्पेनिस भाषी खेलाडीहरू प्रशिक्षकसँग असन्तुष्ट रहेको चर्चा थियो।
चेल्सीले अलोन्सोलाई “हेड कोच” नभई “म्यानेजर” का रूपमा नियुक्त गर्न लागेको बताइएको छ। यसले क्लबभित्र उनको प्रभाव र भूमिकालाई थप बलियो बनाउने अपेक्षा गरिएको छ।
यद्यपि खेलाडी खरिद–बिक्रीमा निर्णय भने क्लबका स्पोर्टिङ डाइरेक्टरहरूसँगको सहकार्यमा हुनेछ। चेल्सीले आगामी सिजनका लागि कम्तीमा एक डिफेन्डर, मिडफिल्डर र फरवार्ड भित्र्याउने तयारी गरिरहेको छ।
क्लबभित्रको सांस्कृतिक समस्या पनि गम्भीर रूपमा देखिएको छ। एफए कप फाइनलअघि करिब २०० समर्थकले विरोध प्रदर्शन गरेका थिए। समर्थक र क्लबबीच दूरी बढ्दै गएको तथा खेलाडी र व्यवस्थापनबीच पनि विभाजन देखिएको बताइएको छ।
मैदानभित्र पनि चेल्सीको प्रदर्शन कमजोर रह्यो। टोलीले यो सिजन प्रिमियर लिगमा सबैभन्दा कम दूरी कभर गर्ने टोलीमध्ये एकको रूपमा आलोचना खेपेको छ। अनुशासनहीनता, महत्त्वपूर्ण खेलमा खराब प्रदर्शन र लगातार हारले टोलीको मानसिक अवस्था कमजोर बनेको विश्लेषण गरिएको छ।
अन्तरिम प्रशिक्षक कालुम म्याकफार्लेनले एफए कप फाइनलपछि टोलीले राम्रो संघर्ष गरेको प्रतिक्रिया दिएका थिए। उनले टोलीको लडाइँ गर्ने भावना पछिल्ला खेलमा देखिएको बताएका छन्।
चेल्सी पछिल्ला पाँच महिनामा एन्जो मारेस्का, रोजेनियर, म्याकफार्लेन हुँदै अब अलोन्सोसम्म पुग्दा क्लबको नेतृत्वमाथि प्रश्न उठिरहेको छ। अब अलोन्सोमाथि चेल्सीलाई फेरि सफलताको बाटोमा फर्काउने ठूलो जिम्मेवारी रहनेछ।
