यस शुक्रबार नेपाली, बलिउड र हलिउड गरी पाँच नयाँ फिल्म एकसाथ प्रदर्शनमा आउने भएका छन्, जसले हलमा दर्शकको भीड र प्रतिस्पर्धा दुवै बढाउने अपेक्षा गरिएको छ।
प्रदर्शनमा आउन लागेका नेपाली फिल्महरूमा ‘मालती मंगले’, ‘लालीबजार’ र ‘गुरुआमा’ रहेका छन् भने बलिउडको ‘कृष्णावतरम पार्ट १’ र हलिउडको ‘मोर्टल कम्ब्याट पार्ट २’ पनि एकैसाथ रिलिज हुँदैछन्।
अदालतको आदेशपछि प्रदर्शनको बाटो खुलेसँगै ‘लालीबजार’ शुक्रबारदेखि नियमित प्रदर्शनमा आउने निश्चित भएको हो। हलहरूले उपलब्ध शोजलाई फिल्महरूको माग र सम्भावनाअनुसार विभाजन गरेका छन्, जसअनुसार ‘लालीबजार’ले १२० शो, ‘मालती मंगले’ले १०३ शो र ‘गुरुआमा’ले ७१ शो पाएका छन्।
विशेषगरी ‘लालीबजार’ र ‘मालती मंगले’लाई दर्शकमाझ बढी प्रतीक्षित फिल्मका रूपमा हेरिएको छ। यी दुवै फिल्ममा लोकप्रिय कलाकारहरूको उपस्थिति रहेकाले बक्सअफिस प्रतिस्पर्धा रोचक हुने अनुमान गरिएको छ।
‘लालीबजार’ले बादी समुदायकी एक महिलाको छोरीको प्रतिष्ठा र जीविकाका लागि गरेको संघर्षको कथा प्रस्तुत गर्छ भने ‘मालती मंगले’मा विजय बराल र वर्षा राउतलगायतका कलाकारको अभिनय रहेको छ।
यसैबीच, अहिले प्रदर्शनरत ‘परालको आगो’ले पनि बक्सअफिसमा उत्साहजनक व्यापार गरिरहेको बताइएको छ। नयाँ फिल्महरूको आगमनसँगै शुक्रबारदेखि नेपाली फिल्म बजार थप चलायमान हुने अपेक्षा गरिएको छ।
