गृहमन्त्री रमेश लेखकले पर्सा जिल्लामा फैलिएको हैजा महामारी नियन्त्रणका लागि नेपाली सेनासहित अतिरिक्त स्वास्थ्य जनशक्ति खटाउने तयारी गरिएको बताएका छन्।
शनिबार अबेर राति वीरगञ्जस्थित नारायणी अस्पतालमा हैजा र झाडापखालाका विरामीहरुसँग भेटघाटपछि आयोजित ब्रिफिङ कार्यक्रममा उनले महामारी नियन्त्रणमा सरकारले कुनै कसर बाँकी नराख्ने प्रतिबद्धता व्यक्त गरे।
उनले भने, “नागरिकको जीवन बचाउन सरकारले कुनै कमी गर्न दिने छैन। आवश्यक औषधि, जनशक्ति र स्रोतसाधन तुरुन्त उपलब्ध गराइनेछ।”
गृहमन्त्री लेखकका अनुसार सुरक्षा समितिको निर्णयअनुसार नेपाल प्रहरी, सशस्त्र प्रहरी र नेपाली सेनाबाट मेडिकल फिल्डका जनशक्ति पठाइनेछ। थप जनशक्ति आवश्यक परे तत्काल पठाइने प्रतिबद्धतासमेत उनले जनाए।
अस्पतालको स्थलगत अवलोकन गर्दै मन्त्री लेखकले उपचाररत विरामीसँग औषधि, सुविधा र उपचारको अवस्थाबारे सोधपुछ गरे। उनले थपे, “हैजा पूर्ण रूपमा नियन्त्रणमा ल्याउनुपर्छ। नागरिकको जीवन रक्षा गर्न कुनै पनि कमी छ भने तुरुन्त जानकारी दिनुपर्छ।”
उनका अनुसार मन्त्रिपरिषद्ले रोग नियन्त्रण र जनजीवन सुरक्षित गर्न आवश्यक सबै कदम चाल्ने निर्णय गरिसकेको छ।
भेटघाट कार्यक्रममा कानुन मन्त्री अजयकुमार चौरसिया, खानेपानी मन्त्री प्रदीप यादव, मधेस प्रदेशका कृषि मन्त्री जनार्दन सिंह क्षेत्री, प्रदेश सांसद श्याम पटेल, पूर्वगृहमन्त्री कृष्णप्रसाद सिटौलासहित अन्य अधिकारीहरूको सहभागिता थियो।
नारायणी अस्पतालका मेसु चुमनलाल दासका अनुसार, संक्रमण देखिएको नौ दिनयता ३६८ जना विरामी अस्पताल भर्ना भएका छन्। तीमध्ये ३१२ जना उपचारपछि निको भई घर फर्किसकेका छन् भने ५६ जना अहिले पनि उपचाररत छन्। आइसियुमा रहेका पाँचमध्ये तीन जनाको शनिबार मात्रै डायलासिस गरिएको उनले जानकारी दिए।
गृहमन्त्री लेखकले विज्ञहरुसँगको सल्लाहअनुसार हैजा फैलनुका मूल कारण पहिचान गरी स्थायी समाधानका उपायहरूमा सरकारले काम गर्ने बताए।
