फिफा विश्वकप २०२६ को समूह चरण अन्तिम चरणमा प्रवेशसँगै नकआउट चरणको समीकरण झन् रोचक बनेको छ। ४८ टोली सहभागी प्रतियोगिताबाट ३२ टोली अन्तिम ३२ मा पुग्ने भएकाले कुन टोलीले कसरी स्थान बनाउने भन्ने चासो बढेको छ।
हालसम्मका खेलअनुसार समूह ‘एल’को शीर्ष स्थानमा रहेको इङ्ग्ल्यान्ड र समूह ‘सी’मा तेस्रो स्थानमा रहेको स्कटल्यान्ड अन्तिम ३२ मा एकअर्कासँग भिड्न सक्ने सम्भावना देखिएको छ। तर त्यसका लागि दुवै टोलीले आफ्नो पहिलो नकआउट खेल जित्नुपर्नेछ।
यद्यपि स्कटल्यान्ड ब्राजिलसँग ३–० ले पराजित भएपछि उत्कृष्ट तेस्रो स्थानमा रहने टोलीका रूपमा अघिल्लो चरणमा पुग्ने सम्भावना कमजोर बनेको छ। तथ्यांकअनुसार उसको सम्भावना करिब ३८ प्रतिशत मात्र रहेको छ।
यसपटक विश्वकपमा १२ समूहका शीर्ष दुई टोली स्वतः अन्तिम ३२ मा पुग्नेछन् भने बाँकी आठ स्थान उत्कृष्ट प्रदर्शन गर्ने तेस्रो स्थानका टोलीले पाउनेछन्। यदि दुई वा बढी टोलीको अंक बराबर भएमा पहिलो आधार आपसी नतिजा हुनेछ। त्यसपछि गोलअन्तर, गोल संख्या, अनुशासन अंक (फेयर प्ले) र अन्त्यमा फिफा वरीयताको आधारमा स्थान निर्धारण गरिनेछ।
हालसम्म आयोजक मेक्सिको, संयुक्त राज्य अमेरिका, ब्राजिल, जर्मनी, नेदरल्यान्ड्स, स्विट्जरल्यान्ड, अर्जेन्टिना, फ्रान्स, नर्वे, कोलम्बिया, इङ्ग्ल्यान्डलगायतका टोली नकआउट चरण नजिक वा सुरक्षित अवस्थामा छन्। दक्षिण अफ्रिकाले पहिलो पटक अन्तिम ३२ मा स्थान बनाएको छ भने आइभरी कोस्ट, जापान, मोरक्को, अस्ट्रेलियालगायत टोलीले पनि अघिल्लो चरणमा स्थान सुरक्षित गरिसकेका छन्।
अर्कोतर्फ पराग्वे, दक्षिण कोरिया, इक्वेडर, स्विडेन, बोस्निया–हर्जेगोभिना, प्रजातान्त्रिक गणतन्त्र कङ्गो, घाना, क्रोएसिया, साउदी अरेबिया तथा अन्य केही टोली उत्कृष्ट तेस्रो स्थानको आधारमा नकआउट चरणमा पुग्ने आशामा छन्।
यसबीच समूह ‘जी’, ‘एच’, ‘आई’, ‘जे’, ‘के’ र ‘एल’का अन्तिम खेल बाँकी रहेकाले नकआउट चरणको पूर्ण चित्र अझै स्पष्ट हुन बाँकी छ। अन्तिम खेलहरूको नतिजाले समूह विजेता, उपविजेता र उत्कृष्ट तेस्रो स्थानमा रहने टोलीहरूको टुंगो लगाउनेछ।
विश्वकपको अन्तिम ३२ चरणका खेल जुलाई १ देखि सुरु हुने तालिका रहेको छ भने फाइनल जुलाई १९ मा हुनेछ। प्रतियोगिता अगाडि बढ्दै जाँदा उपाधि दाबेदार टोलीहरूको यात्रा र सम्भावित भिडन्तले फुटबल समर्थकमाझ थप उत्साह सिर्जना गरेको छ।
