कुनै समय विश्व क्रिकेटका ठूला टोलीसँग खेल्न मात्र सपना देख्ने नेपाल अब त्यही टोलीलाई आफ्नै मैदानमा उतार्ने तयारीतर्फ अघि बढिरहेको छ ।
विश्व क्रिकेटमा सनसनी मच्चाइरहेको नेपाली क्रिकेटका लागि अब अर्को ऐतिहासिक ढोका खुल्ने संकेत देखिएको छ । इंग्ल्यान्ड क्रिकेट बोर्ड (ईसीबी) ले सन् २०२७–३१ को अन्तर्राष्ट्रिय चक्रभित्र नेपाल भ्रमण गर्दै छोटो टी–२० अन्तर्राष्ट्रिय सिरिज खेल्ने सम्भावनाबारे गम्भीर छलफल सुरु गरेको छ ।
यदि यो सम्भावना वास्तविकतामा परिणत भयो भने, इंग्ल्यान्ड नेपाल भ्रमण गर्ने सबैभन्दा ठूलो अन्तर्राष्ट्रिय क्रिकेट टोली बन्नेछ ।
नेपालमा टेस्ट राष्ट्रको प्रतीक्षा अन्त्य हुने संकेत
नेपालले पछिल्ला वर्षहरूमा अन्तर्राष्ट्रिय क्रिकेटमा तीव्र प्रगति गरेको छ । गत वर्ष यूएईमा वेस्ट इन्डिजलाई हराउँदै नेपालले पहिलो पटक पूर्ण आईसीसी सदस्य राष्ट्रविरुद्ध सिरिज जितेको थियो ।
तर, अझैसम्म कुनै टेस्ट खेल्ने राष्ट्रले नेपालमा औपचारिक अन्तर्राष्ट्रिय सिरिज खेलेको छैन । अब भने त्यो प्रतीक्षा अन्त्य हुने सम्भावना बलियो बन्दै गएको छ ।
यसअघि क्रिकेट आयरल्याण्डले नेपाल क्रिकेट संघ (क्यान) सँग पाँच वर्षे रणनीतिक साझेदारी सम्झौता गर्दै सन् २०२६–२७ को जाडोयाममा नेपाल भ्रमण गर्ने योजना सार्वजनिक गरिसकेको छ ।
टी–२० विश्वकपपछि सुरु भयो नयाँ चर्चा
इंग्ल्यान्ड र नेपालबीच पहिलो पटक गत फेब्रुअरीमा टी–२० विश्वकपमा भेट भएको थियो । मुम्बईको वानखेडे रंगशालामा भएको रोमाञ्चक खेलमा इंग्ल्यान्डले अन्तिम बलमा मात्रै जित निकालेको थियो ।
त्यस खेलपछि क्यानका सचिव तथा पूर्वकप्तान पारस खड्काले भारतमै ईसीबीका अधिकारीहरूसँग भेटवार्ता गरेको खुलासा भएको छ । त्यसपछि इंग्ल्यान्डको सम्भावित नेपाल भ्रमणबारे चर्चा तीव्र बनेको हो ।
‘नेपाललाई एक्सपोजर चाहिएको छ’: पारस खड्का
स्काई स्पोर्ट्सले हालै प्रसारण गरेको ‘नेपाल: क्लाइम्बिङ क्रिकेट्स माउन्टेन’ नामक डकुमेन्ट्रीमा पारस खड्काले टेस्ट राष्ट्रहरूलाई नेपाल भ्रमण गर्न खुला आग्रह गरेका छन् ।
“नेपाल क्रिकेटलाई अहिले सबैभन्दा बढी आवश्यक कुरा एक्सपोजर हो,” पारसले भनेका छन्, “हामी एकदिवसीय राष्ट्र हौँ । टेस्ट खेल्ने टोलीसँग खेल्दा मात्र खेलाडीले सिक्ने अवसर पाउँछन् ।”
उनले थपे, “यदि इंग्ल्यान्ड वा अस्ट्रेलिया नेपाल आयो भने त्यसले विश्व क्रिकेटलाई नेपाल पनि राम्रो क्रिकेट खेल्छ भन्ने सन्देश दिन्छ ।”
नेपाली क्रिकेटको उकालो यात्रा
नेपालका कप्तान रोहित पौडेलले समेत ठूला टोलीको नेपाल भ्रमणले नेपाली क्रिकेटलाई विश्वसामु चिनाउने बताएका छन् ।
उनका अनुसार यस्तो भ्रमणले देशभरका युवा पुस्तामा क्रिकेटप्रतिको मोह झन् बढाउनेछ ।
“नेपालमा क्रिकेट खेल मात्र होइन, देशलाई एकताबद्ध बनाउने भावना बनिसकेको छ,” पारसको भनाइ उद्धृत गर्दै डकुमेन्ट्रीमा उल्लेख गरिएको छ ।
इंग्ल्यान्डको व्यस्त तालिकाबीच नेपाल सम्भावना
सन् २०२७ मा इंग्ल्यान्डले घरेलु मैदानमा प्रतिष्ठित एसेस सिरिज आयोजना गर्नेछ । त्यस्तै पाकिस्तान र न्युजिल्यान्डविरुद्ध पनि सिरिज तय हुने सम्भावना छ ।
यद्यपि, ईसीबीले अर्को एसियाली भ्रमणअघि नेपालमा २ वा ३ खेलको टी–२० सिरिज राख्ने विकल्पबारे छलफल गरिरहेको बताइएको छ ।
यदि यो योजना सफल भयो भने कीर्तिपुर क्रिकेट मैदानले विश्व क्रिकेटकै एउटा ऐतिहासिक क्षण देख्नेछ ।
