वीरगञ्ज महानगरपालिका–२६ मा नेपाल कम्युनिष्ट पार्टी (एमाले) पर्सा क्षेत्र नं. २ की प्रतिनिधि सभा सदस्य उम्मेदवार रिमा कुमारी यादवको सघन घरदैलो कार्यक्रम उत्साहजनक रूपमा सम्पन्न भएको छ। चुनावी माहोल तातिरहेका बेला उम्मेदवार यादव टोल–टोलमा पुगेर मतदातासँग प्रत्यक्ष संवादमा जुटेकी हुन्।
घरदैलो कार्यक्रममा समानुपातिक उम्मेदवार बिचारी यादव, प्रदेश कमिटी सदस्य रमिला खातुन, क्षेत्र नं. २ का अध्यक्ष मनोज कुशवाहा लगायतका नेता तथा कार्यकर्ताको उल्लेखनीय सहभागिता रहेको थियो। टोलीले स्थानीय बासिन्दासँग भेटघाट गर्दै विकास, शिक्षा, स्वास्थ्य, कृषि, रोजगारी तथा पूर्वाधार निर्माणका विषयमा आफ्ना योजना प्रस्तुत गरेको थियो।
उम्मेदवार रिमा यादवले पर्सा–२ लाई आर्थिक, सामाजिक र पूर्वाधारका दृष्टिले नमुना क्षेत्र बनाउने प्रतिबद्धता व्यक्त गरिन्। युवालाई रोजगारी सिर्जना, किसानलाई आधुनिक कृषि प्रविधिसँग जोड्ने, महिलाको सशक्तीकरण तथा नगर क्षेत्रमा सडक, ढल र सरसफाइ व्यवस्थापनलाई प्राथमिकतामा राख्ने उनको भनाइ थियो।
कार्यक्रममा नेताहरूले मतदातालाई आगामी निर्वाचनमा ‘सूर्य’ चुनाव चिह्नमा मतदान गरी एमाले उम्मेदवारलाई विजयी बनाउन आग्रह गरेका थिए। स्थानीय बासिन्दाले विकास र सुशासनको अपेक्षा राख्दै सकारात्मक प्रतिक्रिया दिएका जनाइएको छ।
वडा नं. २६ मा सम्पन्न उक्त कार्यक्रमसँगै एमालेको चुनावी अभियान थप सक्रिय बनेको छ। नेता–कार्यकर्ताले आगामी दिनमा पनि घरदैलो तथा जनभेटघाटलाई अझ तीव्रता दिने बताएका छन्।
