पर्सा निर्वाचन क्षेत्र नम्बर–१ का प्रतिनिधिसभा सदस्य उम्मेदवार ओमप्रकाश सरार्फले वीरगञ्ज महानगरपालिका वडा नम्बर–२ मा घरदैलो कार्यक्रम सम्पन्न गर्दै जनतासँग प्रत्यक्ष संवादलाई चुनावी अभियानको मुख्य आधार बनाएका छन्। जनमत पार्टीका तर्फबाट उम्मेदवार बनेका सरार्फले स्थानीय बासिन्दासँग भेटघाट गर्दै खानेपानी, सडक, ढल, रोजगारी, स्वास्थ्य र शिक्षा लगायतका विषयमा विस्तृत छलफल गरेका हुन्।
घरदैलोका क्रममा स्थानीयवासीहरूले वर्षौंदेखि भोग्दै आएको खानेपानी समस्या प्रमुख सरोकारका रूपमा उठाएका थिए। त्यसप्रति सरार्फले दीर्घकालीन समाधानका लागि स्थायी पाइपलाइन विस्तार, पानी ट्यांकी निर्माण तथा आधुनिक प्रविधिको प्रयोगमार्फत समस्या समाधान गरिने प्रतिबद्धता व्यक्त गरे। “खानेपानी नागरिकको आधारभूत अधिकार हो, यसमा कुनै सम्झौता हुँदैन,” उनले स्पष्ट पारे।
त्यसैगरी, वर्षायाममा हिलाम्मे सडक र अव्यवस्थित ढल निकासका कारण सास्ती खेप्नुपरेको विषयमा पनि उनले पूर्वाधार विकासलाई प्राथमिकतामा राख्दै गुणस्तरीय सडक निर्माण र ढल व्यवस्थापन सुधार गर्ने योजना अघि सारे। स्थानीय तह र संघीय सरकारबीच समन्वय गरी विकास कार्यलाई तीव्रता दिने उनले बताए।
भेटघाटमा भूमिसम्बन्धी समस्या, सार्वजनिक जग्गा संरक्षण तथा अतिक्रमण रोकथामको विषय पनि उठेको थियो। सरार्फले सार्वजनिक सम्पत्तिको संरक्षण र पारदर्शी प्रशासनिक प्रणालीमार्फत विवाद समाधान गरिने प्रतिबद्धता जनाए।
युवाहरूका लागि रोजगारी सिर्जना, सीपमूलक तालिम र उद्यमशीलता प्रवर्द्धन पनि उनको प्रमुख एजेन्डा रहेको उनले बताए। “युवाशक्ति देशको मेरुदण्ड हो, उनीहरूलाई यहीँ अवसर दिनु हाम्रो कर्तव्य हो,” उनले भने।
स्वास्थ्य चौकी स्तरोन्नति, औषधि आपूर्ति व्यवस्थापन, गुणस्तरीय शिक्षा, महिला सशक्तीकरण र सामाजिक सद्भाव कायम राख्ने विषयमा पनि उनले प्राथमिकता दिने स्पष्ट पारे।
घरदैलो अभियानका क्रममा प्रत्येक घरमा पुगेर सुझाव र गुनासो सुन्ने प्रयास गरिएको थियो। स्थानीय बासिन्दाले उम्मेदवारसँग प्रत्यक्ष संवाद गर्न पाएकोमा खुशी व्यक्त गरेका थिए।
सरार्फले आफ्नो अभियान केवल चुनाव जित्ने उद्देश्यले नभई दीर्घकालीन विकास र सुशासनको स्पष्ट दृष्टिकोणसहित अघि बढेको बताए। “जनताको विश्वास नै मेरो सबैभन्दा ठूलो शक्ति हो, म यहाँ वाचा गर्न होइन, काम गर्न आएको हुँ,” उनले जोड दिए।
वडा नम्बर–२ मा सम्पन्न घरदैलो कार्यक्रमसँगै जनमत पार्टीको चुनावी अभियानले थप गति लिएको छ। विकास, पारदर्शिता र जवाफदेहिताको एजेन्डासहित सरार्फले आफ्नो चुनावी यात्रा निरन्तर अघि बढाइरहेका छन्।
