पर्सा क्षेत्र नम्बर १ अन्तर्गत वीरगञ्ज महानगरपालिका–१६ नगवा टोलमा प्रतिनिधि सभा सदस्य उम्मेदवार ओमप्रकाश सर्राफले घरदैलो अभियान सञ्चालन गर्दै स्थानीय मतदातासँग प्रत्यक्ष संवाद कार्यक्रम सम्पन्न गरेका छन्। जनमत पार्टीबाट उम्मेदवार सर्राफले क्षेत्रका वास्तविक समस्या बुझ्दै समाधानमुखी पहल गर्ने आफ्नो प्रतिबद्धता व्यक्त गरेका छन्।
घरदैलो अभियानमा सर्राफले नगवा टोलका प्रत्येक गल्ली र बस्तीमा पुगेर वर्षायाममा हुने डुबान, अव्यवस्थित नाला–ढल निकास, भित्री सडकको दुरवस्था, सडक बत्तीको अभाव, खानेपानीको अनियमित आपूर्ति, फोहोर व्यवस्थापन, स्वास्थ्य तथा शिक्षा, बेरोजगारी र सीमावर्ती व्यापारिक चुनौतीहरूबारे मतदातासँग खुला छलफल गरेका थिए।
सर्राफले संघीय, प्रदेश र स्थानीय तहबीच समन्वय गर्दै दीर्घकालीन पूर्वाधार विकास योजनामार्फत डुबान नियन्त्रण, सडक स्तरोन्नति, सडक बत्ती विस्तार, सुरक्षित यातायात व्यवस्था र बजार व्यवस्थापन सुधार गर्ने प्रतिबद्धता दोहोर्याए। युवालाई स्वरोजगारतर्फ आकर्षित गर्न सीपमूलक तालिम, साना–मझौला उद्यम प्रवर्द्धन र लगानीमैत्री वातावरण निर्माण गर्ने योजना पनि उनले प्रस्तुत गरे।
खानेपानी र फोहोर व्यवस्थापनको सुधार, स्वास्थ्य सेवा सुदृढीकरण, जनशक्ति व्यवस्थापन र सामुदायिक विद्यालयको गुणस्तर सुधारमा पनि उनले जोड दिएका छन्। उनले मतदातालाई विकास, सुशासन र पारदर्शितामार्फत पर्सा क्षेत्र नम्बर १ लाई नमुना निर्वाचन क्षेत्र बनाउने लक्ष्य प्रस्तुत गरे।
स्थानीय मतदाताले सर्राफको सरल व्यवहार, प्रत्यक्ष संवाद शैली र कार्यान्वयनमुखी योजना देखेर उत्साहित भएको बताएका छन्। घरदैलो अभियानले क्षेत्रमा नयाँ ऊर्जा र भरोसा सिर्जना गरेको छ भने चुनावी माहोल थप तातो बनाएको विश्लेषकहरू बताउँछन्।
