पार्टीभित्र बढ्दो महाधिवेशन विवादलाई समाधान गर्ने उद्देश्यले नेपाली कांग्रेसका सभापति शेरबहादुर देउवाले आइतबार पार्टी पदाधिकारी तथा पूर्वपदाधिकारीहरूको बैठक आह्वान गरेका छन्।
एक नेताका अनुसार दिउँसो १ बजे, देउवाको महाराजगञ्जस्थित निवासमा बस्ने बैठकमा इतर समूहका नेता डा. शेखर कोइराला, पूर्वगृहमन्त्री रमेश लेखक, पदाधिकारीसँगै पूर्वपदाधिकारी नभएका वरिष्ठ नेताहरूलाई पनि सहभागी हुन बोलाइएको छ।
गत असोज २८ गते उपसभापति पूर्णबहादुर खड्कालाई कार्यवाहक सभापतिको जिम्मेवारी दिएपछि करिब एक महिनासम्म पार्टी गतिविधिमा निष्क्रिय देखिएका देउवा, महाधिवेशन मिति–विवाद चर्किँदै गएपछि पछिल्ला दिनमा सक्रिय रूपमा नेताहरूसँग निरन्तर छलफल गरिरहेका छन्। बिहीबारदेखि उनले दुवै समूहका नेताहरूसँग छुट्टाछुट्टै भेटवार्ता गरिरहेका छन्, र आइतबार दुबै पक्षलाई एउटै बैठकमा बोलाएका छन्।
कांग्रेसभित्र संस्थापन पक्षका केही नेताहरू १५औँ महाधिवेशन फागुन २१ मा तोकिएको प्रतिनिधिसभा निर्वाचनपछि मात्र गर्नुपर्छ भन्ने अडानमा थिए। पूर्वउपसभापति विमलेन्द्र निधि र पूर्वमहामन्त्री कृष्णप्रसाद सिटौला निर्वाचनअघि महाधिवेशन हुन नहुने पक्षमा कडा रूपमा उभिनुले विवाद थपिएको थियो।
तर मध्यमार्गी नेताहरूको पहलपछि संस्थापन पक्षका केही नेता निर्वाचनअघि महाधिवेशनको प्रक्रिया सुरु गर्न तयार भएका छन्। यद्यपि निधि र सिटौला भने अझै पनि सहमत हुन तयार नसकेका कारण समस्या जारी रहेको एक नेताले जानकारी दिए।
कांग्रेस नेताहरूका अनुसार देउवाको आह्वानमा बस्ने आइतबारको यो निर्णायक बैठकले पार्टी नियमित वा विशेष महाधिवेशन गर्ने विषयमा अन्तिम निष्कर्ष निकाल्ने अपेक्षा छ।
-1759064972.jpg)
