मधेश प्रदेशको सभा बैठक प्रतिपक्षी दलहरूको अवरोधका कारण अनिश्चितकालका लागि स्थगित भएको छ। अर्थमन्त्री सुनिल कुमार यादवको राजीनामा माग्दै प्रतिपक्षी दलहरूले आज पनि प्रदेश सभा बैठक अवरुद्ध गरेका हुन्।
प्रतिपक्षी दल नेकपा एकीकृत समाजवादीका सांसद कनिष पटेलले अर्थमन्त्रीले ल्याएको बजेट त्रुटिपूर्ण भएको र बहुमतले पास गरिएको भन्दै राजीनामा मागेका छन्। उनले अर्थमन्त्रीको राजीनामा नआएसम्म सदन अवरुद्ध जारी रहने बताएका छन्।
यसपछि नेपाली कांग्रेसका प्रमुख सचेतक कुमारकान्त झाले प्रतिपक्षी दलको कार्यप्रणालीको आलोचना गर्दै सर्वदलीय बैठकमा सहभागी नहुने र सदन अवरुद्ध गर्ने कार्यले सदन सञ्चालनमा समस्या सिर्जना गरेको आक्रोश पोखे।
अन्ततः सभामुख रामचन्द्र मण्डलले बैठक अर्को सूचना नआएसम्म स्थगित गर्ने निर्णय गरेका छन्। प्रतिपक्षी दलहरूले दुई दिनदेखि सभामुखले बोलाएको सर्वदलीय बैठकसमेत बहिष्कार गर्दै आएका छन्।
मधेश प्रदेश सरकारको आर्थिक वर्ष २०८२/०८३ को बजेटलाई त्रुटिपूर्ण र बिचौलिया हावी भएको भन्दै प्रतिपक्षी दलहरू असन्तुष्ट छन्। यस विषयमा सभामुखले तटस्थता नअपनाएको पनि प्रतिपक्षी दलहरूको आरोप छ।
मधेश प्रदेश सभाको छैठौं अधिवेशनको पहिलो बैठक बिहीबार पनि प्रतिपक्षी दलहरूले अवरुद्ध गरेका थिए। प्रतिपक्षी दलहरू जसपा नेपाल, नेकपा माओवादी केन्द्र, नेकपा एकीकृत समाजवादी, नेपाल संघीय समाजवादी पार्टी, राप्रपा नेपाल र नागरिक उन्मुक्ति पार्टीले सदन चल्न नदिने रणनीति अपनाएका छन्।
