पर्साको वीरगञ्ज महानगरपालिका हैजाको महामारीको चपेटामा परेको छ । केही दिनयता झाडापखालासहित हैजाका बिरामी बढ्दै जाँदा शुक्रबारसम्म तीन जनामा पुष्टि भएको रोग शनिबारसम्म बढ्दै ३६ जनामा पुगेको छ ।
अस्पतालमा असाधारण चाप
बढ्दो सङ्क्रमणसँगै नारायणी अस्पतालदेखि निजी अस्पतालसम्म बिरामीले शय्या पाउन मुस्किल भएको छ । नारायणी अस्पतालका सूचना अधिकारी डा. उदयनारायण सिंहका अनुसार शय्या अभाव भएपछि बिरामीलाई बरामदाको भुईँमा राखेर उपचार गर्नुपरेको छ । अहिले नारायणी अस्पतालमा मात्र ३० भन्दा बढी बिरामीको उपचार भइरहेको छ भने दुई जनाको मृत्यु भइसकेको छ ।
महामारी समुदायमै फैलियो
स्वास्थ्य कार्यालय पर्साका जनस्वास्थ्य अधिकृत जयमोद ठाकुरले वडा नम्बर ३, ११, १२, १३ र ३० मा सङ्क्रमण फैलिएको पुष्टि गरेका छन् । “यो अवस्था समुदाय स्तरमै फैलिएको हो,” उनले बताए ।
स्थानीय सरकारका आकस्मिक कदम
सङ्क्रमण रोकथामका लागि वीरगञ्ज महानगरपालिकाले विद्यालयहरू भदौ ८ र ९ गते दुई दिनका लागि बन्द गर्ने निर्णय गरेको छ । साथै, सडकमा पाइने पानीपुरी, चाट र चटपटेजस्ता खाद्यपदार्थको बिक्रीमा पूर्ण रोक लगाइएको छ । मेयर राजेशमान सिंहले अस्पताललाई कुनै पनि बिरामी उपचारविना वञ्चित नहोस् भन्दै विशेष निर्देशन दिएका छन् ।
महानगरले २५ टोली स्वास्थ्यकर्मी परिचालन गरी घर–घरमा सचेतना फैलाउने, बिरामीलाई अस्पताल पुर्याउने र सरसफाइ अभियान चलाउने काम थालेको छ । नर्सिङ क्याम्पसका विद्यार्थीहरूलाई समेत जोखिमयुक्त क्षेत्रमा खटाइएको छ ।
प्रदेश र केन्द्र सरकार सक्रिय
खानेपानी मन्त्री प्रदीप यादवले स्वयं वीरगञ्ज पुगेर अस्पतालहरूको अनुगमन गरेका छन् । दूषित पानीको स्रोत पत्ता लगाउन विभागको प्राविधिक टोलीले पानीको नमुना परीक्षण थालेको छ । त्यस्तै, मधेस प्रदेश सरकारले चिकित्सक टोली खटाएको छ भने जिल्ला स्वास्थ्य सङ्कट व्यवस्थापन समितिले सबै सरोकारवालासँग समन्वय गरी सघन अभियान चलाउने निर्णय गरेको छ ।
महामारीको कारण अझै यकिन छैन
हैजा भिब्रियो कोलरी नामक जीवाणु दूषित पानी वा खानामार्फत सर्छ । तर, वीरगञ्जमा रोगको मुख्य स्रोत के हो भन्ने अझै पत्ता लागिसकेको छैन । मुर्ली टोललगायत प्रभावित क्षेत्रमा संकलन गरिएका नमुना परीक्षणका लागि काठमाडौँ पठाइएका छन् ।
चिकित्सकको आग्रह : आत्तिनु पर्दैन
वरिष्ठ चिकित्सक डा. नीरज सिंहका अनुसार झाडापखाला र हैजा समयमै उपचार गरे निको हुने रोग हो । उनले भने, “हामी सबैले सावधानी अपनाउनुपर्छ, तर आत्तिनु पर्दैन ।”
