राजावादी प्रदर्शनमा संलग्न रहेको अभियोगमा पक्राउ परेका राप्रपाका वरिष्ठ उपाध्यक्ष रविन्द्र मिश्र र महामन्त्री धवल शमशेर राणा अदालतको आदेशपछि वकिलको जिम्मामा छुटे । तर, उनीहरू अदालतमै उपस्थित नभएपछि प्रहरीलाई बुझाएका दुई वकिललाई ५०–५० हजार रुपैयाँ जरिवाना गरिएको छ।
जिल्ला प्रहरी परिसर, काठमाडौंका एसपी अपील राज बोहराका अनुसार अनुसन्धान अधिकृतले मुलुकी फौजदारी कार्यविधि संहिताअनुसार जमानी दिने वकिलहरूमाथि जरिवाना तोकेको हो। संहिताको दफा १५ मा निर्दिष्ट गरिएको प्रक्रियाअनुसार, निर्धारित समयमा अदालतमा उपस्थित नगराएमा जिम्मा लिने व्यक्ति वा वकिललाई जरिवाना गर्न सकिने व्यवस्था छ।
गत चैत १५ गते तीनकुनेमा भएको राजावादी प्रदर्शन हिंसात्मक बनेपछि मिश्र र राणालाई प्रहरीले पक्राउ गरेको थियो। सर्वोच्च अदालतको आदेशअनुसार २ जेठमा मिश्र र ७ वैशाखमा राणा हाजिरी जमानीमा छुटेका थिए। तर, दुवैजना अहिलेसम्म मुद्दा प्रक्रिया अघि बढ्दा समेत सम्पर्कविहीन छन्।
प्रदर्शनका क्रममा कीर्तिपुरका सविन महर्जन र पत्रकार सुरेश रजकको मृत्यु भएपछि सुरक्षाकर्मीमाथि आक्रमण, तोडफोड, आगजनी लगायतको आरोपमा मिश्र र राणासहित ६५ जनाविरुद्ध राजद्रोह, आपराधिक उपद्रव, संगठित अपराधको मुद्दा दर्ता भएको थियो। अहिले सो मुद्दामा काठमाडौं जिल्ला अदालतमा थुनछेक बहस चलिरहेको छ।
उक्त प्रदर्शन ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ अन्तर्गत दुर्गा प्रसाईं र पूर्वपञ्ज नवराज सुवेदीको नेतृत्वमा गरिएको थियो। घटनाको कमान्ड प्रसाईंले सम्हालेका थिए भने मिश्र र राणासमेतको सक्रिय संलग्नता रहेको बताइएको छ।
सम्पर्कविहीन नेताहरूको गैरहाजिरीसँगै अब मुद्दाको मोड थप जटिल बन्दै गएको देखिन्छ।
