इन्डियन प्रिमियर लिग (आईपीएल) २०२६ को उपाधि रोयल च्यालेन्जर्स बेंगलुरु (आरसीबी) ले जित्दा टोलीका चर्चित खेलाडीहरूको प्रदर्शन मात्र निर्णायक बनेन, अवसर पाउँदा आफूलाई प्रमाणित गरेका खेलाडीहरूले पनि टोलीको सफलतामा महत्वपूर्ण योगदान दिए।
फाइनलमा गुजरात टाइटन्स (जीटी) विरुद्ध आरसीबीले १५६ रनको लक्ष्य पछ्याउँदै सहज जित निकालेको थियो। गुजरातका लागि कप्तान शुभमन गिल, साई सुदर्शन र जोस बटलरमाथिको अत्यधिक निर्भरताले फाइनलमा असर पार्दा आरसीबीले भने टोलीको गहिराइ (स्क्वाड डेप्थ) को फाइदा उठायो।
गुजरातले सिजनभर गिल, सुदर्शन र बटलरको प्रदर्शनमा भरोसा गरेको थियो। यी तीन खेलाडीले मात्र झण्डै दुई हजार रन जोडेका थिए। तर फाइनलमा गिल र सुदर्शन पावरप्लेमै आउट भएपछि टोली दबाबमा परेको थियो। त्यसपछि नम्बर–३ मा बटलरको सट्टा निशान्त सिन्धुलाई पठाउने निर्णय पनि सफल हुन सकेन। सिन्धु १८ बल खेलेर आउट भए र गुजरातको इनिङ्स थप कमजोर बन्यो।
आरसीबीका लागि युवा तीव्र गतिका बलर रसिख सलामले फाइनलमा उत्कृष्ट प्रदर्शन गर्दै ३ विकेट लिए। उनले सिजनभर १९ विकेट हात पार्दै टोलीको बलिङ आक्रमणलाई सन्तुलित बनाएका थिए। यश दयालको अनुपस्थितिपछि अवसर पाएका रसिखले पावरप्ले, मध्य ओभर र डेथ ओभर सबै चरणमा प्रभावशाली बलिङ गर्दै आफूलाई महत्वपूर्ण खेलाडीका रूपमा स्थापित गरे।
आरसीबी कप्तान रजत पाटीदारले रसिखको स्पष्ट योजना र आत्मविश्वास नै उनको सफलताको कारण भएको बताए। उनका अनुसार रसिखले आफ्नो भूमिकाबारे स्पष्ट बुझाइ राख्दै टोलीका लागि महत्वपूर्ण योगदान दिएका थिए।
त्यस्तै, ब्याटिङतर्फ वेंकटेश अय्यरले पनि आवश्यक पर्दा फरक–फरक भूमिकामा खेलेर टोलीलाई साथ दिए। सुरुआतमा नियमित अवसर नपाएका उनले फिल साल्ट र जेकब बेथेल उपलब्ध नभएको अवस्थामा ओपनिङको जिम्मेवारी सम्हाले। फाइनलमा उनले १६ बलमा ३२ रन बनाउँदै आरसीबीलाई बलियो सुरुआत दिलाए।
कप्तान पाटीदारले वेंकटेश सधैं टोलीको आवश्यकताअनुसार कुनै पनि स्थानमा ब्याटिङ गर्न तयार रहने खेलाडी भएको बताए। उनले वेंकटेशको लचकता र टोलीप्रतिको प्रतिबद्धताको प्रशंसा गरे।
फाइनलअघि विराट कोहलीले वेंकटेशसँग पावरप्लेमै खेल आफ्नो पक्षमा पार्ने लक्ष्यबारे कुराकानी गरेको खुलासा गरेका थिए। त्यसपछि वेंकटेशले आक्रामक ब्याटिङ गर्दै टोलीलाई सहज स्थितिमा पुर्याएका थिए।
आरसीबीले यस सिजन जम्मा १६ खेलाडी मात्र प्रयोग गरेको थियो, जुन आईपीएल इतिहासकै सबैभन्दा कममध्ये एक हो। तर ती खेलाडीभित्र भूमिकाको विविधता र आवश्यकता अनुसार आफूलाई ढाल्ने क्षमताले टोलीलाई निरन्तर सफलता दिलायो।
जोस हेजलउड, भुवनेश्वर कुमार, विराट कोहली र टिम डेभिडजस्ता स्टार खेलाडीहरूले अपेक्षित प्रदर्शन गरे पनि आरसीबीको उपाधि यात्रामा रसिख सलाम र वेंकटेश अय्यरजस्ता खेलाडीहरूको योगदानले विशेष महत्व पायो। गुजरात टाइटन्सको हारले सीमित खेलाडीमाथिको निर्भरता उजागर गरिरहँदा आरसीबीको सफलताले बलियो टोली संरचना र विकल्पहरूको महत्वलाई प्रमाणित गरेको छ।
