भारतीय क्रिकेटमा अहिले १५ वर्षीय वैभव सूर्यवंशीको चर्चा सर्वत्र छ । राजस्थान रोयल्सका युवा ब्याटर सूर्यवंशीले आईपीएलमा देखाएको विस्फोटक प्रदर्शनले क्रिकेट जगतलाई नै स्तब्ध बनाएको छ ।
न्यु चण्डीगढमा सनराइजर्स हैदराबादविरुद्ध भएको महत्वपूर्ण खेलमा सूर्यवंशीले निर्भीक ब्याटिङ गर्दै सबैको ध्यान खिचे । प्लेअफजस्तो दबाबपूर्ण खेलमा पनि उनले कुनै डर वा तनाव बिना आक्रामक शैली अपनाएका थिए ।
खेलको सुरुआतदेखि नै उनले अस्ट्रेलियाली कप्तान प्याट कमिन्समाथि दबाब सिर्जना गरे । कमिन्सले विभिन्न रणनीति अपनाए पनि सूर्यवंशी रोकिएनन् । उनले एकै ओभरमा २५ रन प्रहार गर्दै मैदान तताएका थिए ।
सूर्यवंशीले केवल २० बलमा ६० रन पूरा गरेका थिए । एक चरणमा उनले १० बलमै ६ छक्का प्रहार गरे । उनको आक्रामक ब्याटिङकै कारण राजस्थानले सहज जिततर्फ अग्रसरता लिएको थियो ।
क्रिकेट विश्लेषकहरूका अनुसार सूर्यवंशी अहिले आईपीएलकै सबैभन्दा खतरनाक सिक्स हिटरमध्ये एक बनेका छन् । उनको प्रत्येक ४.३ बलमा एक छक्का प्रहार गर्ने दर आईपीएल इतिहासमै उत्कृष्टमध्ये मानिएको छ । यो कीर्तिमान वेस्ट इन्डिजका विस्फोटक ब्याटर क्रिस गेलभन्दा पनि प्रभावशाली रहेको बताइएको छ ।
सूर्यवंशीको विशेषता भनेको उनी कुनै पनि दबाबबाट प्रभावित नहुनु रहेको विश्लेषण गरिएको छ । उमेरमा सानै भए पनि उनी मैदानमा अत्यन्त आत्मविश्वासी देखिन्छन् । विपक्षी खेलाडीको अनुभव वा प्रतिष्ठाले उनलाई असर नगर्ने देखिएको छ ।
राजस्थान रोयल्सका कप्तान रियान परागले खेलपछि भने, “हामी उनलाई धेरै निर्देशन दिँदैनौं । उनी आफ्नै शैलीमा खेल्छन् ।”
त्यस्तै विकेटकिपर ब्याटर ध्रुव जुरेलले सूर्यवंशी कुनै योजना बिना स्वतन्त्र रूपमा खेल्ने खेलाडी भएको बताएका छन् ।
सूर्यवंशी शतकबाट केवल ३ रनले चुकेका थिए । आउट भएपछि केहीबेर उनी मैदानमै स्तब्ध उभिएका थिए भने उनका साथी खेलाडी यशस्वी जैसवाल समेत निराश देखिएका थिए ।
यद्यपि, क्रिकेट विश्लेषकहरूका अनुसार वैभव सूर्यवंशीको यात्रा भर्खर सुरु भएको हो । १५ वर्षको उमेरमै आईपीएलमा सनसनी मच्चाएका उनी आगामी वर्षहरूमा भारतीय क्रिकेटका सबैभन्दा ठूला स्टार बन्न सक्ने अनुमान गरिएको छ ।
