मधेशका तीन पालिकामा ‘सुरक्षा र न्याय’ कार्यक्रमको सामाजिक परीक्षण सम्पन्न भएको छ। सर्लाहीको बरहथवा नगरपालिका, बाराको सिम्रौनगढ नगरपालिका र धनुषाको जनकपुरधाम उपमहानगरपालिकामा चैत १५, १६ र १७ गते आयोजना गरिएको सामाजिक परीक्षण कार्यक्रममा सरोकारवाला निकायहरूको उल्लेखनीय सहभागिता रहेको थियो।
बेलायत सरकारको आर्थिक सहयोगमा पिपुल इन निडको नेतृत्व, दिव्य विकास स्रोत केन्द्र र हामी दाजुभाइ संस्थाको संयुक्त प्रयासमा सञ्चालित कार्यक्रमअन्तर्गत सम्पन्न गतिविधिहरूको लेखाजोखा, बजेट तथा खर्च सार्वजनिकरण, सरोकारवालाबीच समन्वय तथा सहकार्य विस्तार र सेवा प्रदायक निकायलाई थप जवाफदेही बनाउने उद्देश्यसहित सामाजिक परीक्षण गरिएको आयोजकले जनाएको छ।
कार्यक्रममा मधेश प्रदेशको समाज कल्याण मन्त्रालय, शिक्षा तथा संस्कृति मन्त्रालयका प्रतिनिधि, जिल्ला समन्वय समिति (जिसस) का पदाधिकारी, सम्बन्धित पालिकाका प्रमुख तथा उपप्रमुख, न्यायिक समिति संयोजक, प्रमुख प्रशासकीय अधिकृत, वडाध्यक्ष, कार्यपालिका सदस्य, विभिन्न शाखा प्रमुख, विद्यालयका प्रधानाध्यापक, सञ्चारकर्मी तथा स्थानीय सरोकारवाला निकायहरूको सहभागिता रहेको थियो।
परियोजना व्यवस्थापक गणेशबहादुर ठकुरीले सामाजिक परीक्षणले सरोकारवालाबीच सहकार्य विस्तार भएको, लैङ्गिक हिंसा रोकथाम तथा प्रतिकार्यका लागि प्रदेश र स्थानीय तहमा संयन्त्र स्थापना भएको तथा सेवा प्रदायक निकायहरू थप जिम्मेवार बन्दै गएको बताए। उनले आगामी दिनमा अझ प्रभावकारी रूपमा कार्यक्रम सञ्चालन गर्न सबै पक्ष एकजुट हुनुपर्नेमा जोड दिए।
पिपुल इन निड मधेश प्रदेशका परियोजना व्यवस्थापक सुनिलकुमार साहले स्थानीय तहसँगको सहकार्यलाई सराहनीय ठहर गर्दै जनप्रतिनिधि तथा कर्मचारीप्रति धन्यवाद व्यक्त गरे। उनले मधेश क्षेत्रमा विद्यमान सामाजिक हानिकारक अभ्यासविरुद्ध सामूहिक पहल आवश्यक रहेको बताए।
सिम्रौनगढ नगरपालिकाका नगरप्रमुख किशोरी साह कलवारले कार्यक्रमले समुदायमा सकारात्मक प्रभाव पारेको उल्लेख गर्दै कार्यान्वयनमा सहयोग आवश्यक रहेको बताए भने बरहथवा नगरपालिकाका उपप्रमुख रामबाबु साहले कार्यक्रमले लैङ्गिक हिंसा रोकथाम र सामाजिक रूपान्तरणमा महत्वपूर्ण योगदान पुर्याएको बताए।
जनकपुरधाम उपमहानगरपालिकामा सम्पन्न कार्यक्रममा जिल्ला समन्वय समिति धनुषाका प्रमुख राजनन्दन मण्डलले सामाजिक परीक्षणले पारदर्शिता अभिवृद्धिमा सहयोग पुग्ने विश्वास व्यक्त गरे। नगरप्रमुख मनोज साहले कार्यक्रम प्रभावकारी र विश्वसनीय रहेको उल्लेख गरे।
सहभागीहरूले सामाजिक परीक्षणले सुशासन प्रवर्द्धन तथा नागरिक विश्वास अभिवृद्धिमा महत्वपूर्ण भूमिका खेलेको धारणा राखेका थिए। दिव्य विकास स्रोत केन्द्रका कार्यकारी निर्देशक रामाकान्त प्रसाद कुर्मी र उपाध्यक्ष सलमा खातुनको अध्यक्षतामा सम्पन्न कार्यक्रमको सहजीकरण सञ्चारकर्मी लक्ष्मी खरेलले गरेकी थिइन्।
