आगामी फागुन २० मा कार्यकाल सकिँदै गर्ने १९ राष्ट्रिय सभा सदस्यको रिक्त स्थान भर्ने निर्वाचन माघ ११ गते गर्ने तयारी अगाडि बढेको छ। राष्ट्रिय सभाका अध्यक्ष नारायणप्रसाद दाहालले गत शुक्रबार निर्वाचन आयोगका आयुक्तहरूसँग छलफल गरेका थिए।
निर्वाचन आयोगका आयुक्तहरूले अध्यक्ष दाहाललाई आगामी माघ ११ गते निर्वाचन गर्ने तयारी भइसकेको जानकारी दिएका थिए। यसअघि प्रधानमन्त्री सुशीला कार्कीले पनि असोज २१ गते आयोगका आयुक्तहरूसँग छलफल गरी राष्ट्रिय सभाको निर्वाचनका विषयमा जानकारी लिएकी थिइन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको छलफलमा कार्यवाहक प्रमुख निर्वाचन आयुक्त रामप्रसाद भण्डारी, आयुक्त डा. जानकीदेवी तुलाधर र सगुन शमशेर जबरा उपस्थित थिए। आइतबार अध्यक्ष दाहाल र प्रधानमन्त्री कार्कीबीच पनि निर्वाचन तयारीबारे छलफल भएको थियो।
अध्यक्ष दाहालका अनुसार, “२ दिन अगाडि मैले निर्वाचन आयुक्तलाई बोलाएको थिएँ। उनीहरूले आफ्नो कार्यतालिका भित्र राखिसकेका छन्। अब सरकारसँग समन्वय गरेर अघि बढ्ने कुरा भएको छ।”
कानुनी व्यवस्था अनुसार राष्ट्रिय सभाका सदस्यको कार्यकाल सकिनुभन्दा कम्तीमा ३५ दिन अगावै निर्वाचन सम्पन्न हुनुपर्ने छ। यसै कारण माघ दोस्रो साताभित्र निर्वाचन गरिसक्नुपर्ने बाध्यता रहेको निर्वाचन आयोगको भनाइ छ।
प्रधानमन्त्री कार्कीले पनि समयमै निर्वाचन गर्न सकारात्मक दृष्टिकोण राखेकी छन्। अध्यक्ष दाहालले बताएअनुसार प्रधानमन्त्रीले निर्वाचनमा जेनजी (जनप्रतिनिधि) को सहभागिताबारे चासो राखेकी थिइन्।
निर्वाचनमा स्थानीय तहका प्रमुख–उपप्रमुख र प्रदेश सभा सदस्यहरू मतदाता हुने व्यवस्था छ। अध्यक्ष दाहालले मतदाताबारे राजनीतिक दलहरूसँग छलफल गर्न सकिने सुझाव पनि दिएका छन्।
फागुन २० मा कार्यकाल सकिँदै गर्ने १९ सदस्यमा एमालेका ८, माओवादी केन्द्रका ७, एकीकृत समाजवादीका १, जनता समाजवादी पार्टी नेपालका १, लोकतान्त्रिक समाजवादी पार्टीका १ र राष्ट्रपतिबाट मनोनीत १ सदस्य छन्।
कार्यकाल सकिने सदस्यहरू:
- एमाले: इन्दिरा देवी गौतम, गोपाल भट्टराई, तुलसाकुमारी दाहाल, देवेन्द्र दाहाल, भगवती न्यौपाने, विमला घिमिरे, शारदा देवी भट्ट, सुमित्रा बीसी
- माओवादी केन्द्र: गोपीबहादुर सार्की अछामी, गंगाकुमारी बेलवासे, जगप्रसाद शर्मा, तारामान स्वाँर, नारायणकाजी श्रेष्ठ, मायाप्रसाद शर्मा, राधेश्याम पासवान
- एकीकृत समाजवादी: बेदुराम भुसाल
- जनता समाजवादी पार्टी नेपाल: मृगेन्द्रकुमार सिंह यादव
- लोकतान्त्रिक समाजवादी पार्टी: शेखरकुमार सिंह
राष्ट्रपतिबाट मनोनीत सांसद बामदेव गौतमको कार्यकाल सकिने भएकोले नयाँ सदस्य राष्ट्रपतिद्वारा मनोनीत गरिनेछ।
अध्यक्ष दाहालले निर्वाचनमा सुरक्षा समस्या नभएको र सात वटा प्रदेशमा सहज रूपमा निर्वाचन सम्पन्न हुने बताउँदै राजनीतिक दलसँग सहमति भए मतदान प्रक्रिया अझ व्यवस्थित हुने बताएका छन्।
-1760356606.jpg)
-1760356606.jpg)
-1759065636.jpg)
-1759064972.jpg)
