राष्ट्रिय मान्यताप्राप्त राजनीतिक दलका शीर्ष नेताहरूले आगामी स्थानीय तह र प्रदेश तहको निर्वाचनलाई प्रविधिमैत्री बनाउनुपर्नेमा जोड दिएका छन् ।
शुक्रबार निर्वाचन आयोगले आयोजना गरेको छलफलमा सहभागी दलका नेताहरूले स्थानीय र प्रदेश तहको निर्वाचनसँगै आगामी दिनमा हुने सबै प्रकारका निर्वाचनलाई क्रमशः प्रविधिमैत्री बनाउँदै लैजानुपर्ने धारणा राखेका हुन् ।
छलफलपछि सञ्चारकर्मीसँग कुरा गर्दै सत्तारूढ राष्ट्रिय स्वतन्त्र पार्टी (रास्वपा)का प्रवक्ता जगदीश खरेलले निर्वाचन आयोगले आसन्न निर्वाचनको तयारीबारे राजनीतिक दलहरूलाई जानकारी गराएको बताए ।
उनका अनुसार निर्वाचन संविधानको भावनाविपरीत नहुने गरी संवैधानिक, आर्थिक, प्राविधिक र राजनीतिक पक्षलाई ध्यानमा राखेर राष्ट्रिय सहमतिका आधारमा सम्पन्न गर्नुपर्नेमा दलहरू एकमत भएका छन् ।
निर्वाचनलाई स्वतन्त्र, निष्पक्ष र धाँधलीरहित बनाउन आयोगलाई आवश्यक सहयोग गर्ने प्रतिबद्धतासमेत दलहरूले व्यक्त गरेको खरेलले जानकारी दिए ।
छलफलमा स्थानीय तह र प्रदेश तहको निर्वाचन एकै समयमा गर्ने वा फरक–फरक मितिमा गर्ने भन्ने विषयमा पनि बहस भएको थियो । निर्वाचन आयोगले यस विषयमा राजनीतिक सहमति जुटाउन दलहरूलाई आग्रह गरेको उनले बताए ।
उनका अनुसार निर्वाचनमा उम्मेदवारले गर्ने खर्च घटाउन आवश्यकताका आधारमा संविधान तथा कानुनमा सुधार गर्नुपर्ने विषय पनि आयोगले उठाएको थियो ।
त्यस्तै, प्रवासमा रहेका नेपाली नागरिकलाई आगामी स्थानीय तह तथा प्रदेश तहको निर्वाचनमा मतदानको अधिकार दिनुपर्ने विषय आफूले छलफलमा राखेको खरेलले बताए ।
दलहरूबीच थप छलफलपछि निर्वाचनको मिति र प्रक्रियाबारे आवश्यक निर्णयमा पुगिने अपेक्षा गरिएको छ ।