जन्तर–मन्तरमा सोमबार भएको ककरोच जनता पार्टी (CJP) को प्रदर्शनपछि राजधानी दिल्लीमा सुरक्षा व्यवस्था थप कडा बनाइएको छ। प्रदर्शनका क्रममा भएको तोडफोडको घटनामा दिल्ली प्रहरीले पाँच वटा एफआईआर दर्ता गर्दै सीसीटीभी फुटेजको आधारमा संलग्न व्यक्तिहरूको पहिचान भइरहेको जनाएको छ।
दिल्ली प्रहरीले संसद् मार्ग, कनट प्लेसलगायत विभिन्न प्रहरी कार्यालयमा मुद्दा दर्ता गरेको जनाएको छ। घटनापछि नयाँ दिल्लीसहित संवेदनशील क्षेत्रमा बहुस्तरीय सुरक्षा घेरा, अतिरिक्त सुरक्षाकर्मी परिचालन तथा सवारीसाधन जाँचलाई कडा पारिएको छ।
यसैबीच, प्रदर्शनको नेतृत्व गरिरहेका सामाजिक अभियन्ता सोनम वाङ्चुक ले चिकित्सकको पटक–पटकको आग्रहका बाबजुद पनि नसाबाट दिइने तरल पदार्थ (आईभी फ्लुइड) र ग्लुकोज लिन अस्वीकार गरिरहेको सफदरजंग अस्पतालले जनाएको छ। अस्पतालका अनुसार वाङ्चुकको स्वास्थ्य अवस्था स्थिर रहे पनि रगतमा चिनीको मात्रा कम हुनुका साथै अन्य स्वास्थ्य सूचकहरूको निरन्तर निगरानी भइरहेको छ।
प्रदर्शनका आयोजक तथा सीजेपी संयोजक अभिजित दिप्के ले सोमबारको प्रदर्शनमा प्रहरीले अनावश्यक बल प्रयोग गरेको आरोप लगाएका छन्। उनका अनुसार भीड नियन्त्रणका लागि पानीको फोहोरा प्रयोग गर्न सकिने अवस्थामा प्रहरीले लाठीचार्ज र अश्रुग्यास प्रहार गरेको थियो। उनले प्रदर्शनस्थल वरपर इँटा–ढुंगाले भरिएका ट्रक कसरी पुगे भन्ने विषयमा पनि प्रश्न उठाएका छन्।
सीजेपी प्रवक्ता आशुतोष रांका ले प्रदर्शनका क्रममा धेरै विद्यार्थी घाइते भएको, केही स्वयंसेवक गम्भीर रूपमा घाइते भएको तथा वाङ्चुककी पत्नी गीतााञ्जली आङ्मोलाई पनि दुर्व्यवहार गरिएको आरोप लगाए। उनले आन्दोलन अझ सशक्त बनाइने चेतावनी दिएका छन्।
उता, आम आदमी पार्टी (आप) का नेता सौरभ भारद्वाज ले पनि प्रदर्शनस्थलमा ढुंगा बोकेका ट्रक, सादा पोसाकमा लाठी बोकेका व्यक्तिहरूको उपस्थितिबारे प्रश्न उठाउँदै घटनाको निष्पक्ष छानबिन हुनुपर्ने बताएका छन्।
कांग्रेस सांसद प्रियंका गान्धी, मनीष तिवारी, रेणुका चौधरी, वरिष्ठ अधिवक्ता तथा राज्यसभा सदस्य कपिल सिब्बल लगायत विपक्षी नेताहरूले विद्यार्थीमाथि भएको प्रहरी कारबाहीको आलोचना गरेका छन्। रेणुका चौधरीले संसद् परिसर वरिपरि सुरक्षा घेरा र इन्टरनेट सेवा अवरुद्ध गरिएको विषयमा नियम २६७ अन्तर्गत स्थगन प्रस्ताव दर्ता गरेकी छन्।
यसैबीच, अभिनेता सोनु सूद, गायक–अभिनेता दिलजीत दोसाञ्झ तथा हास्य कलाकार वीर दास ले पनि विद्यार्थीमाथिको बल प्रयोगको विरोध गर्दै उनीहरूको मागप्रति सरकारले संवेदनशील हुनुपर्ने बताएका छन्।
मानवअधिकार संस्था ह्युमन राइट्स वाच ले पनि आन्दोलनका क्रममा भएको बल प्रयोगको स्वतन्त्र छानबिन गर्न, संयमता अपनाउन तथा शान्तिपूर्ण प्रदर्शनको अधिकार सुनिश्चित गर्न भारत सरकारसँग आग्रह गरेको छ।
यस घटनापछि राजधानी दिल्लीमा राजनीतिक आरोप–प्रत्यारोप तीव्र बनेको छ भने आन्दोलनकारीहरूले आफ्ना माग पूरा नभएसम्म आन्दोलन जारी रहने बताएका छन्।
