विश्व फुटबलका समर्थकहरूको नजर आइतबार हुने विश्वकपको अन्तिम–१६ अन्तर्गतको ब्राजिल र नर्वेबीचको प्रतिस्पर्धामा केन्द्रित हुनेछ। विशेषगरी इंग्लिस प्रिमियर लिगमा लामो समयदेखि चर्चित व्यक्तिगत प्रतिस्पर्धामा रहेका नर्वेका स्टार स्ट्राइकर एर्लिङ हालान्ड र ब्राजिलका डिफेन्डर गाब्रिएल मगलाएसबीचको भिडन्त यस खेलको प्रमुख आकर्षण बनेको छ।
प्रिमियर लिगमा म्यानचेस्टर सिटीका हालान्ड र आर्सनलका गाब्रिएलबीच विगत केही सिजनदेखि लगातार तनावपूर्ण प्रतिस्पर्धा हुँदै आएको छ। दुवै खेलाडीबीच मैदानमा पटक–पटक विवाद र भनाभन भएको इतिहास रहेकाले विश्वकपमा उनीहरूको पुनः भेटलाई विशेष चासोका साथ हेरिएको छ।
यस खेलको विजेताले क्वार्टरफाइनलमा इंग्ल्यान्ड वा मेक्सिकोमध्ये एकसँग प्रतिस्पर्धा गर्नेछ।
विशेष भिडन्त हुने विश्लेषकहरूको विश्वास
इंग्ल्यान्डका पूर्व स्ट्राइकर क्रिस सटनले हालान्ड र गाब्रिएलबीचको प्रतिस्पर्धालाई यस विश्वकपकै सबैभन्दा ठूलो व्यक्तिगत द्वन्द्वको रूपमा व्याख्या गरेका छन्।
उनले भने, "लियोनेल मेस्सी, किलियन एमबाप्पे, ह्यारी केन र हालान्डबीच गोल्डेन बुटको प्रतिस्पर्धा भए पनि यस विश्वकपमा सबैभन्दा रोचक व्यक्तिगत भिडन्त हालान्ड र गाब्रिएलबीच हुनेछ। दुवैबीचको पुरानो तनावले खेलको नतिजामा समेत ठूलो प्रभाव पार्न सक्छ।"
पूर्व इंग्ल्यान्ड कप्तान एलन शियररले पनि दुवै खेलाडीबीचको प्रतिस्पर्धा निकै रोमाञ्चक हुने बताएका छन्।
कहाँबाट सुरु भयो विवाद ?
हालान्ड र गाब्रिएलबीचको विवाद सन् २०२४ सेप्टेम्बर २२ मा भएको म्यानचेस्टर सिटी र आर्सनलबीचको प्रिमियर लिग खेलपछि चर्किएको थियो।
सिटीका जोन स्टोन्सले खेलको ९८औँ मिनेटमा बराबरी गोल गरेपछि हालान्डले बल उठाएर गाब्रिएलको टाउकोमा प्रहार गरेका थिए। त्यसपछि उनले आर्सनलका प्रशिक्षक मिकेल आर्टेटालाई "Stay Humble" भन्दै व्यंग्य गरेका थिए।
यस घटनापछि दुवै खेलाडीबीचको सम्बन्ध झन् चिसिएको थियो।
पछि सन् २०२५ फेब्रुअरीमा आर्सनलले म्यानचेस्टर सिटीलाई ५–१ ले पराजित गर्दा गाब्रिएलले गोल गरेपछि हालान्डको अनुहारअगाडि जोडले चिच्याउँदै बदला लिएका थिए। त्यसबेला उनले आफूले हालान्डले गरेको व्यवहारकै जवाफ दिएको बताएका थिए।
अप्रिलमा सिटीले २–१ ले जित्दा हालान्डले टेलिभिजन क्यामेरासामु गीत गाउँदै उत्सव मनाएका थिए भने मे महिनामा आर्सनलले २४ वर्षपछि प्रिमियर लिग उपाधि जितेपछि गाब्रिएलले सामाजिक सञ्जालमा सोही गीत प्रयोग गर्दै ट्रफीसहितको तस्वीर सार्वजनिक गरेर जवाफ फर्काएका थिए।
ब्राजिलविरुद्ध नर्वेको रोचक इतिहास
तथ्याङ्कअनुसार पाँच पटकको विश्व च्याम्पियन ब्राजिलले नर्वेलाई अहिलेसम्म कुनै पनि खेलमा पराजित गर्न सकेको छैन।
दुवै टोलीबीच भएका चार खेलमध्ये दुई बराबरीमा सकिएका छन् भने दुई खेल नर्वेले जितेको छ। यस कारण ब्राजिलले जित्न नसकेको एकमात्र राष्ट्र नर्वे बनेको छ।
हालान्ड बनाम गाब्रिएल : तथ्याङ्क
क्लब फुटबलमा हालान्ड र गाब्रिएलबीच ११ पटक प्रतिस्पर्धा भएको छ।
- हालान्डले ६ गोल गरेका छन्।
- म्यानचेस्टर सिटीले ५ खेल जितेको छ।
- आर्सनलले २ खेल जितेको छ।
- ४ खेल बराबरीमा सकिएका छन्।
विश्वकप गोल्डेन बुटको दौडमा पनि हालान्ड पाँच गोलसहित प्रतिस्पर्धामा छन्। उनी इंग्ल्यान्डका कप्तान ह्यारी केनसँग बराबरीमा छन् भने फ्रान्सका किलियन एमबाप्पे र अर्जेन्टिनाका लियोनेल मेस्सी सात–सात गोलसहित अगाडि छन्।
आन्सेलोट्टीको रणनीतिमा ब्राजिल
महान प्रशिक्षक कार्लो आन्सेलोट्टीको नेतृत्वमा ब्राजिलले आकर्षकभन्दा पनि व्यावहारिक फुटबल खेल्दै अन्तिम–१६ सम्मको यात्रा तय गरेको छ।
सटनका अनुसार ब्राजिल पहिलेजस्तो पूर्ण आक्रामक टोली नभए पनि अनुभव र रणनीतिका कारण उपाधिको बलियो दाबेदार हो। उनले भिनिसियस जुनियर र युवा खेलाडी रायानलाई ब्राजिलका प्रमुख हतियारका रूपमा उल्लेख गरेका छन्।
खेलको नतिजा यसै भिडन्तमा निर्भर ?
विश्लेषकहरूको विश्वासमा, हालान्डले गाब्रिएललाई दबाबमा राख्न सके नर्वेको जितको सम्भावना बढ्नेछ। यता गाब्रिएलले हालान्डलाई नियन्त्रणमा राखे ब्राजिल क्वार्टरफाइनल पुग्ने सम्भावना बलियो हुनेछ।
यसकारण ब्राजिल र नर्वेबीचको अन्तिम–१६ को खेल केवल दुई राष्ट्रबीचको प्रतिस्पर्धा मात्र नभई विश्व फुटबलकै चर्चित व्यक्तिगत प्रतिस्पर्धाको अर्को अध्यायका रूपमा पनि हेरिएको छ।
