नेपाली कांग्रेसका पूर्व सांसद अफताब आलमलाई रिहा गर्ने निर्णयमा संलग्न न्यायाधीशमाथि मोसो छ्याप्ने कार्यमा संलग्न अभियुक्तको रिहाइको माग गर्दै प्रदर्शन गरेका सात जनालाई प्रहरीले नियन्त्रणमा लिएको छ।
शुक्रबार दिउँसो काठमाडौंको माइतीघर मण्डलामा नेकपा बहुमतका कार्यकर्ताले प्रदर्शन गरेका थिए। प्रदर्शनका क्रममा निषेधित क्षेत्र उल्लंघन गरेपछि प्रहरीले हस्तक्षेप गर्दै उनीहरूलाई नियन्त्रणमा लिएको हो। जिल्ला प्रहरी परिसर काठमाडौंका एसपी अपिलराज बोहराका अनुसार, पक्राउ परेकाहरू नेकपा बहुमत निकट विद्यार्थी संगठन अखिल क्रान्तिकारीमा आबद्ध छन्।
पक्राउ परेकाहरूको परिचय
प्रहरीले नियन्त्रणमा लिएका सात जनामा नेकपा बहुमतका सर्जन पाण्डे, हरि विष्ट, उषाकिरण कामी, सक्षम विक, झलक विक, सर्जन कामी र प्रमोद सिंह छन्। ती सबै अखिल क्रान्तिकारीका विभिन्न तहका पदाधिकारी रहेको प्रहरीले जनाएको छ।
न्यायाधीशमाथि मोसो प्रकरण
पूर्व सांसद अफताब आलमलाई रिहा गर्ने फैसला उच्च अदालत जनकपुर, वीरगन्ज इजलासका न्यायाधीश डा. खुसीराम थारु र अर्जुन महर्जनले गरेका थिए। उक्त फैसलापछि नेकपा बहुमतका कार्यकर्ताले असन्तुष्टि जनाउँदै बिहीबार न्यायाधीश थारुमाथि अदालतमै मोसो छ्यापेका थिए।
मोसो प्रहार गर्ने तीन जना पक्राउ
न्यायाधीशमाथि मोसो प्रहार गरेको आरोपमा प्रहरीले तीन जनालाई पहिल्यै पक्राउ गरिसकेको छ। पक्राउ पर्नेमा प्यूठानको गौमुखी गाउँपालिका–६ स्थायी घर भई हाल ललितपुरको कुपन्डोलमा बसोबास गर्ने ३८ वर्षीय अविनाश उर्फ किशोर कुँवर, सर्लाहीको बरहथवा नगरपालिका–२ का ४३ वर्षीय पदम बहादुर मगर र सिराहाको गोलबजार नगरपालिकाका ४८ वर्षीय गर्भु महतो रहेका छन्। उनीहरू क्रमशः नेकपा बहुमतका केन्द्रीय सदस्य, जिल्ला इञ्चार्ज र जिल्ला समिति सम्पर्क सदस्य रहेको खुलेको छ।
