फिफा विश्वकप २०२६ मा उपाधिको प्रमुख दाबेदार मानिएको स्पेनले आफ्नो सफलताको श्रेय कुनै एक स्टार खेलाडीलाई नभई सामूहिक प्रदर्शनलाई दिएको छ। क्वार्टरफाइनलमा बेल्जियमसँग भिड्नुअघि मुख्य प्रशिक्षक लुइस डेला फुएन्तेले टोलीको एकता नै आफ्नो सबैभन्दा ठूलो शक्ति भएको बताएका छन्।
डेला फुएन्तेका अनुसार विश्वकपजस्तो प्रतियोगितामा व्यक्तिगत प्रतिभाभन्दा टोलीको समन्वय र अनुशासनले जित दिलाउने गर्छ।
उनले रोमन सम्राट मार्कस अउरेलियसको भनाइ उद्धृत गर्दै भने, “घारका लागि जे हानिकारक हुन्छ, त्यो मौरीका लागि पनि हानिकारक हुन्छ।” उनका अनुसार स्पेनका सबै खेलाडीले व्यक्तिगत उपलब्धिभन्दा टोलीको हितलाई पहिलो प्राथमिकतामा राखेका छन्।
स्पेनले यस विश्वकपमा अहिलेसम्म एक गोल पनि नखाई क्वार्टरफाइनल यात्रा तय गरेको छ। अन्तिम–१६ मा पोर्चुगललाई १–० ले पराजित गरेको स्पेन अहिले प्रतियोगिताको सबैभन्दा सन्तुलित टोलीमध्ये एक मानिएको छ।
यद्यपि डेला फुएन्तेले बेल्जियमविरुद्धको खेललाई अहिलेसम्मकै सबैभन्दा कठिन परीक्षा हुने बताएका छन्। उनका अनुसार बेल्जियमसँग युरोपका शीर्ष क्लबमा खेलेका अनुभवी र जित्न अभ्यस्त खेलाडी छन्।
१८ वर्षीय युवा स्टार लामिन यामाल र चार गोल गरिसकेका मिकेल ओयारजाबालबाट फेरि उत्कृष्ट प्रदर्शनको अपेक्षा गरिएको छ। यामालले हालसम्म एक गोल मात्रै गरे पनि प्रशिक्षकले उनको योगदान गोलभन्दा धेरै ठूलो रहेको बताएका छन्।
शुक्रबार हुने क्वार्टरफाइनलको विजेताले सेमिफाइनलमा फ्रान्ससँग प्रतिस्पर्धा गर्नेछ। तर डेला फुएन्तेले अहिले आफ्नो सम्पूर्ण ध्यान बेल्जियममाथि मात्रै केन्द्रित रहेको स्पष्ट पारेका छन्।
-1783330225.jpeg)
