चार पटकको विश्वकप विजेता इटाली लगातार तेस्रोपटक विश्वकपमा छनोट हुन असफल भएको छ। प्लेअफमा बोस्निया–हर्जेगोभिनासँग पेनाल्टी सुटआउटमा पराजित भएपछि इटालीको यात्रा टुंगिएको हो।
यसअघि इटालीले रूसमा भएको सन् २०१८ को विश्वकप र कतारमा भएको सन् २०२२ को विश्वकपमा पनि स्थान बनाउन सकेको थिएन। कुनै पनि पूर्व विजेता टोलीले लगातार तीन संस्करण गुमाएको यो पहिलो घटना हो।
निर्धारित समय र अतिरिक्त समयमा कडा प्रतिस्पर्धा भएको खेल पेनाल्टीमा पुगेको थियो। इटालीका पियो एस्पोसिटोले प्रहार बाहिर पठाउँदा र ब्रायन क्रिस्टान्टेले बारमा लाग्ने गरी प्रहार गर्दा टोली दबाबमा परेको थियो।
१० खेलाडीमा सीमित इटालीले अन्तिमसम्म संघर्ष गरे पनि सफलता हात पार्न सकेन। प्रशिक्षक जेन्नारो गाटुसोको टोलीले रक्षात्मक खेल देखाउँदै खेललाई पेनाल्टीसम्म पुर्याएको थियो।
बोस्निया–हर्जेगोभिनाले भने आफ्नो इतिहासमा दोस्रोपटक विश्वकपमा स्थान बनाएको छ। ४० वर्षीय कप्तान एडिन जेकोको नेतृत्वमा टोलीले उत्कृष्ट प्रदर्शन गरेको हो। अब बोस्निया समूह ‘बी’मा क्यानडा, कतार र स्विट्जरल्यान्डसँग प्रतिस्पर्धा गर्नेछ।
खेलपछि भावुक देखिएका प्रशिक्षक जेन्नारो गाटुसोले हार अत्यन्त पीडादायी भएको बताए। “यो हार पचाउन गाह्रो छ, हामीले देशका लागि जित्नै पर्ने थियो,” उनले भने।
इटालियन फुटबल महासंघका अध्यक्ष गाब्रिएले ग्राभिनाले वर्तमान अवस्था “गहिरो संकट” भएको स्वीकार गरेका छन्।
खेलमा इटालीले अग्रता लिए पनि रक्षक आलेस्सान्द्रो बास्तोनी रातो कार्ड पाएपछि टोली दबाबमा परेको थियो। त्यसपछि बोस्नियाले आक्रमण तीव्र बनाउँदै बराबरी गोल फर्काएको थियो।
इटालीले सन् २००६ मा जर्मनीमा भएको विश्वकप जितेपछि अन्तर्राष्ट्रिय फुटबलमा निरन्तर कमजोर प्रदर्शन गर्दै आएको छ। सन् २०१० र २०१४ मा समूह चरणबाटै बाहिरिएको टोली पछिल्ला तीन विश्वकपमै पुग्न असफल भएको छ।
विशेषज्ञहरूका अनुसार इटालीमा युवा खेलाडी उत्पादनमा कमी, आर्थिक समस्या तथा लिग संरचनामा आएको परिवर्तनका कारण राष्ट्रिय टोली कमजोर बन्दै गएको हो।
यस हारसँगै इटालीको पुनरागमन अझै अनिश्चित देखिएको छ भने विश्व फुटबलमा एक समयको शक्तिशाली राष्ट्र गहिरो संकटमा परेको स्पष्ट भएको छ।
