बाराको जीतपुरसिमरा उपमहानगरपालिका–१ भक्तिनगरमा तीन वर्षीया बालिका गरिमा चौधरीको बलात्कारपछि हत्या गरेको आरोपमा प्रहरीले दुई जनालाई पक्राउ गरी सार्वजनिक गरेको छ।
जिल्ला प्रहरी कार्यालय बाराले बुधबार पत्रकार सम्मेलन गरी घटनामा संलग्न रहेको आरोपमा पक्राउ परेका म्याजिकका सहचालक र चालकलाई सार्वजनिक गरेको हो।
पक्राउ पर्नेमा जीतपुरसिमरा–२ निवासी १६ वर्षीय म्याजिक सहचालक सुमन थापा र ना.१ ज ७७५८ नम्बरको म्याजिकका २४ वर्षीय चालक प्रोग्रेस चौधरी रहेका छन्।
प्रहरीका अनुसार जीतपुरसिमरा–१ दसधुरी बस्ने मनमती चौधरीकी तीन वर्षीया छोरी गरिमा साउन ३१ गतेदेखि हराएकी थिइन्। परिवार तथा स्थानीयवासीले खोजी गरिरहेका बेला भदौ २ गते वीरबहादुर रोकाको एकतले घरको खाली कोठाभित्र बालिका मृत अवस्थामा फेला परेकी थिइन्।
बालिकाको शव फेला परेपछि इलाका प्रहरी कार्यालय सिमरा र जिल्ला प्रहरी कार्यालय बाराबाट प्रहरी टोली घटनास्थल पुगेको थियो। घटनाको अनुसन्धानका लागि प्रदेश प्रहरी कार्यालय वीरगञ्जबाट तालिमप्राप्त कुकुरसहितको अनुसन्धान टोलीसमेत परिचालन गरिएको थियो।
प्रहरीको प्रारम्भिक अनुसन्धानअनुसार सहचालक सुमन थापाले बालिकालाई चकलेटको प्रलोभन देखाएर फकाई घटनास्थलमा लगेको र जबर्जस्ती करणीपछि हत्या गरेको खुलेको छ।
घटनामा चालक प्रोग्रेस चौधरीको समेत संलग्नता हुनसक्ने आशंकामा प्रहरीले उनलाई पक्राउ गरी अनुसन्धान अघि बढाएको जनाएको छ।
प्रहरीका अनुसार पक्राउ परेका दुवै जनाविरुद्ध जबर्जस्ती करणी तथा कर्तव्य ज्यानसम्बन्धी कसुरमा मुद्दा दर्ता गरिएको छ। जिल्ला अदालत बाराबाट चार दिनको म्याद थप गरी घटनाबारे थप अनुसन्धान भइरहेको जिल्ला प्रहरी कार्यालय बाराले जनाएको छ।
घटनासँग सम्बन्धित थप तथ्य तथा प्रमाण संकलन गर्ने काम भइरहेको प्रहरीले जनाएको छ।
