पोर्चुगल फुटबल महासंघले स्टार खेलाडी क्रिस्टियानो रोनाल्डोलाई राष्ट्रिय टोलीको प्रशिक्षण शिविर छाडेको विषयमा निलम्बन गर्दै अनुशासनात्मक कारबाही प्रक्रिया अघि बढाएको छ ।
महासंघले शनिबार विज्ञप्ति जारी गर्दै उक्त प्रकरणलाई अनुशासनसम्बन्धी अनुसन्धान समितिमा पठाइएको जनाएको छ । अनुसन्धान पूरा नभएसम्म समितिको निष्कर्ष गोप्य राखिने महासंघले स्पष्ट पारेको छ ।
४१ वर्षीय रोनाल्डोले नेसन्स लिगमा पर्याप्त खेल समय नपाएको विषयमा नयाँ प्रशिक्षक जोर्जे जेसुससँग मतभेद भएपछि अन्तर्राष्ट्रिय खेल अवधिमै टोलीको शिविर छाडेका थिए । उनले वेल्सविरुद्धको पहिलो खेलमा मात्रै खेलेका थिए । त्यस खेलमा रोनाल्डोको स्थानमा मैदान प्रवेश गरेका गोन्कालो रामोसले गोल गरेका थिए ।
त्यसपछि नर्वेविरुद्धको खेलमा रोनाल्डो बेन्चमै सीमित रहे । उनले टोली छाडेपछि पनि पोर्चुगलले डेनमार्क र नर्वेलाई पराजित गर्दै क्वार्टरफाइनलमा स्थान सुरक्षित गरेको थियो । रोनाल्डोको अनुपस्थितिमा रामोसले अवसरको सदुपयोग गर्दै तीन गोल गरेका थिए ।
टोली छाडेपछि रोनाल्डोले इन्स्टाग्राममा लामो सन्देश लेख्दै आफूलाई निलम्बन हुन सक्ने अपेक्षा रहेको बताएका थिए । उनले ओस्लोमा नर्वेविरुद्धको खेलअघि आफूलाई वार्मअप गर्न लगाएर पनि मैदानमा प्रवेश नगराइएको विषयमा प्रशिक्षकले आफ्नो गल्ती स्वीकार गर्नुपर्ने आशय व्यक्त गरेका थिए ।
पोर्चुगल फुटबल महासंघको अनुशासनसम्बन्धी नियमअनुसार उचित कारणबिना राष्ट्रिय टोलीको प्रशिक्षण, खेल वा अन्य गतिविधिमा अनुपस्थित हुने अथवा बीचमै छाड्ने खेलाडीलाई जरिवानासहित एकदेखि छ महिनासम्म निलम्बन गर्न सकिने व्यवस्था छ ।
रोनाल्डोले टोली छाड्नुअघि महासंघलाई जानकारी गराएको बताइएको छ । तर, उनको निर्णयलाई नियमअनुसार उचित कारण मानिने वा नमानिने भन्ने विषयमा भने स्पष्ट भइसकेको छैन ।
रोनाल्डोले आफूले माफी मागिसकेको उल्लेख गर्दै गल्तीको परिणाम स्वीकार गर्नुपर्ने बताएका छन् । फुटबलमा खेलाडीको हैसियत जस्तोसुकै भए पनि नियम सबैका लागि समान हुनुपर्ने उनको भनाइ छ । उनले समर्थकहरूलाई सम्बोधन गर्दै आफ्नो बिदाइका लागि एक वा एकभन्दा बढी खेल खेल्ने अपेक्षा पनि व्यक्त गरेका छन् ।
अनुशासनात्मक समितिको अनुसन्धानपछि रोनाल्डोमाथि कस्तो कारबाही हुन्छ भन्ने टुंगो लाग्नेछ ।
